عايز تكسب؟

عايز تكسب شقة العمر؟
عايز تكسب فرش الشقة كمان؟
عايز تكسب شبكة العروسة؟
خالى شغل؟
خليك معايا على الخط!
عايز تصيف فى الساحل الشمالى زى الجماعة الأغنيا؟
عايز "مُزة" حلوة تقضى معاك الويك إيند وكمان بالبكينى؟
خليك معايا على الخط!
عايز تكسب عربية على الزيرو؟
عايز تكسب لاب توب وموبيل تاتش بقلم علشان تعمل فيها مهم؟
خليك معايا على الخط!
زهقت من المدام وعايز تبادلها ب "مُزة" تفتح نفسك على الدنيا؟
عايز تخلص من دوشة العيال وقرفهم؟
عايز تخلص من قرف ودوشة الجيران لما بتفتح الشباك؟
خليك معايا على الخط!
عايز تخلص من سحنة زملائك ورؤسائك فى العمل؟!
خليك معايا على الخط!
لو عايز تكسب كل ده يا "فقرى"، اتصل بسرعة على زيرو 900 حيرد عليك نخبة من ألمع أساتذة بيع الوهم الإلكترونى، وحيخدوك على الحنين، ويجروا معاك ناعم كمان، وحيسألوك كام سؤال كده خايبين، ومتقلقش واضح فيه الحل جداً، لدرجة أنك لو استعانت بحمار جحا حيعرف الإجابة علطول، وطبعاً استعانت الأساتذة بالخبرات السابقة فى وضع الأسئلة، على طريقة سوسن بائعة الهوى فى البارات، وهى "بتقرطس الزبون"، وتخليه يفتح لها أكبر عدد من زجاجات البيرة، نفس موضوع.. فتح الدقائق، يالا بسرعة متتردتش لحظة، لو شايف فى نفسك مواصفات صاحبنا المغفل بتاع البار، قوم بسرعة واتصل على زيرو 900، أنا عرفت المغفل، لو أنت كمان عرفت هو مين اتصل برضه على زيرو 900.