"العجوز اللى اتهلك جوايا" قصيدة لمراد ناجح عزيز

بسمعه
كل يوم الصبح بدرى
بيغنى غنوة فريد ..
( الحياه حلوه )
وأنا مستنى حد يقولى مالك
علشان نفضفض سوا
ونقزقز شوية سواد منها
ماهو أصل الأبيض خلص
وكلوه الشبعانين كله
طعم البيوت الملح دايب ف النهار
وأهى ناس بتودع ف ناس
وناس بتتقابل
وصباح الخير ياجارى
لا انت ف حالك ولا أنا ف حالى
طوابير العيش واللى فيها
سعر الخضار / أزمة أنابيب البوتاجاز
وعصام الحضرى
و11 سبتمبر اللى جرح إبتسامة الموناليزا
ولما يوصل الحوار بينهم لنقطه ..
تبدأ تغيم
وتبان على عنيه السنين
اللى إتفطم ع الحزن فيها ليالى
والحرب لسه
وسيوفه صدّت ف الكلام ..
اللى مابين سطوره
حس بشفقه
وإنه كان لازم يتجوز من زمان
وكان .. وكان ..
وأهو قطر العمر فات
ماأخدش من الدنيا حاجه
تبقى حلوه إزاى ؟!
وكل مايقدم لها العشم على طبق
ترجعه فاضى وتقوله بكره
يستنى بكره
وبكره مابيجيش للغلابه
إلا عشان يطمن بس
إنهم عايشين
وبيحلموا
وبيستنوا بكره
زى العجوز اللى إتهلك جوايا ..
رايح جاى
والدنيا لسه مطلعه له لسانها
وأنا كل يوم الصبح
بسمعه
بيغنى غنوة فريد