زيزو في بيان: أنا مستني رد النادي لآخر يوم في الكونفدرالية

أكد أحمد سيد "زيزو"، لاعب نادي الزمالك، أنه لم يوقع لأي نادٍ سواء داخل أو خارج مصر، مشددًا على احترامه الكامل للقلعة البيضاء وجماهيرها، وأنه لا يزال في انتظار رد إدارة النادي بشأن ملف تجديد عقده.
وكتب زيزو عبر حسابه الرسمي على إنستجرام: "الحمد لله. أنا راجل بحترم كل الناس.. لكن للأسف عدم ردي على المعلومات المغلوطة، والتزامي الصمت زاد عن حده .. كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور. بكل وضوح أنا لم أوقع لأي نادي سواء داخل أو خارج مصر. اللي حصل على توقيعي يتفضل يعلن.. إذا كان كلامه صحيح؟ كمان اللي عنده دليل على توقيعي لأي نادي يتفضل يطلعه على الملأ.. الناس لازم تعرف كويس.. أنا بقدر جدا الكيان الكبير اللي أنا بلعب فيه.. ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد".
وأضاف: "ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس ساعات بتقابلها شهور طويلة ومش عايزين يجددوا عقدي، ليه محدش اتكلم عن المستحقات المتأخرة اللي ليّا بقالها كتير، ومش لاقي حد يجاوبني. ليه محدش اتكلم إن التجديد المرة دي جاي في مرحلة متقدمة من عمري بالنسبة للاعبة الكورة.. ولاعب الكورة مهما طال، عمره قصير في الملعب".
وأكمل: "محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده، قلت وهفضل أقول أنا منتظر كلمة النادي.. ورد لاعتبارات كتير. مش لتجميل الصورة، والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف التاني يكون عايزني أكمل.. وتكون فيه استجابة لحاجة من المعروض عليا على الأقل.. لكن للأسف الكلام معايا حاجة.. واللي بيتقال للإعلام حاجة تانية.. أنا مابنفعش أحرج في حد.. ولا أتكلم في حق حد.. لأن اللي بيتقال في الجلسات عيب يتقال بره.. على الأقل من ناحيتي".
واختتم: "أنا مستني رد النادي لحد آخر يوم في الكونفدرالية. وأتمنى ربنا يكرمنا بيا أنا وزمايلي. وأي كلام هيتقال غير كده عن موضوع التجديد أو التوقيع قبل الموعد ده.. يبقى كلام غير صحيح. ورسائتي الوضحة جدا للمسؤولين في النادي اللي أنا بحترمهم جميعا.. أتمنى الحوار في مسألة تجديد العقد يكون بيني وبينكم.. مش عن طريق الإعلام. وأنا كنت ولا زلت واضح معاكم في كل اللي اتكلمت فيه من أمور عادية تساعدنا على إننا نكمل الطريق. شكرا على تفهمكم.. موفقين".