زيزو: اللي عنده دليل على توقيعي لأي نادي يطلعه

أكد أحمد مصطفى زيزو لاعب الفريق الاول لكرة القدم بنادي الزمالك، أنه لم يوقع أي نادي داخل أو خارج مصر.
أعلن االلاعب عبر حسابه على موقع التواصل الاجتماعي «انستجرام»:«الحمد لله. أنا راجل بحترم كل الناس.. لكن للأسف عدم ردي علي المعلومات المغلوطة، والتزامي الصمت زاد عن حده ، وكل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور بكل وضوح أنا لم أوقع لأي نادي سواء داخل أو خارج مصر. اللي حصل على توقيعي يتفضل يعلن..إذا كان كلامه صحيح ؟».
تابع: «كمان اللي عنده دليل على توقيعي لأي نادي برضو يتفضل يطلعه على الملأ.. الناس لازم تعرف كويس انا بقدر جدا الكيان الكبير اللي أنا بلعب فيه.. ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في إتجاه واحد.. ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي، ليه محدش اتكلم عن المستحقات المتأخرة اللي ليا بقالها كثير. ومش لاقي حد يجاوبني. ليه محدش اتكلم انه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول عمره قصير في الملعب».
استكمل تصريحاته: «محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده. قلت وهفضل أقول أنا منتظر كلمة النادي. ورد لإعتبارات كتير مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة لحاجه من المعروض عليا على الأقل.. لكن للأسف الكلام معايا حاجة.. واللي بيتقال للإعلام حاجة تانية..أنا مينفعش اجرح في حد. ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي.. أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي».
استكمل تصريحاته: «أي كلام هيتقال غير كدة في موضوع التجديد أو التوقيع قبل الموعد ده . هيكون كلام غير صحيح. ورسالتي الودية جدا للمسئولين في النادي اللي أنا بحترمهم جميعا.. أتمنى الحوار في مسألة تجديد العقد يكون بيني وبينكم.. مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق. شكرا على تفهمكم موقفي».
ويستعد الزمالك لمواجهة سيليتنبوش الجنوب أفريقي غداً الأربعاء على ستاد القاهرة الدولي في إياب دور الثمانية لبطولة كأس الكونفدرالية الأفريقية.
جدير بالذكر أن لقاء الذهاب الذي أقيم في كيب تاون يوم الأربعاء الماضي كان انتهى بالتعادل السلبي بين الفريقين