شيرين الجيزاوي عن استمرار احتجاز شقيقها: «مصر مفيهاش راجل»

هاجمت شيرين الجيزاوي، شقيقة المحامي الحقوقي أحمد الجيزاوي، المحتجز في السعودية، المسئولين عن الحكم في مصر، بسبب تقاعسهم عن الإفراج عن شقيقها.
وقالت «الجيزاوي»، عبر صفحتها الشخصية على موقع التواصل الاجتماعي «فيس بوك»، في الساعات الأولى صباح اليوم السبت: «هي البلد دي مفيش راجل فيها يخلى عنده دم ويتدخل ويرجعلى أخويا، يا مرشحين الرئاسة والنبى ميبقاش الكرسي همكم أخويا واللى زيه المفترض يبقى أهم همومكم.. ‫السيسي‬ و‫عدلي‬ إنتوا مش بتديروا البلد، طب في واحد مظلوم فالسعودية عنده سرطان اتسجن ظلم وبيتجلد ظلم ماتفكروا في الجيزاوى‬ شوية».
وأضافت: «تخيلوا ولادكم مكانه تخيلوا كدة ابنكم محامى وصاحب قضية اتسجن عشان قال كلمة حق وبيتجلد وهو عنده سرطان.. تخيلوا كدة واحد عنده سرطان بدل ما يعالجوه بيجلدوه.. مريض السرطان ده اللى الكيماوى بيبهدله وبيدمر نفسيته، ومحدش بيزوره ولا أهله عارفين يطمنوا عليه.. ما تتصرفوا بقى وتقوموا بواجبكم وترجعوا ‫الجيزاوي‬ لبلده ماتقوموا بدوركم وتهتموا بيه وباللى زيه.. هتولي أخويا بقى أنا تعبت من غيره».