بكيااااااااااااااااااااااااااااااااا

يا ما فى الجراب يا بكيا.. حد شارى.. حد بايع.. سبع صنايع.. والبخت ضايع ..أبيع أبيع كل البضايع.. حتى المناصب.. حتى الرفايع.. وكل اللى عندى اسمه «بكيا»، ويا ما فى الجراب يا بكيا.. لو تبيعلى أو «تبتاعلى» كلوا بكيا.. يلا بكيا يلا بكيا.. يعنى مثلا عندى فى الجراب أدوات لطرد الوزراء غير المرغوب فيهم.. هتافات سابقة التجهيز.. أساليب تليق بالوزراء السياديين وأخرى لوزراء الخدمات وثالثة لوزراء بلا طعم ولا لون ولا رائحة.. ها .. حد عايز.. حد شارى؟ .. طب عندى إعلان من جماعة الريس مرسى عن توصلها لحل سحرى لمسالة تزايد عدد الوفيات فى المظاهرات.. يوفرون أكفان مجانية لجميع الأعمار.. الأكفان الإخوانية شرعية.. بيضاء تسر الناظرين.. معطرة بالمسك.. لا تدفع أكثر من صوتك فى الانتخابات البرلمانية القادمة.. ها .. حد له نفس فى كفن؟ حد ناوى.. طب عندى كمان فى الجراب إعلان من جبهة الإنقاذ عن مزايدة بالمظروفات الفنية والمالية لتوريد كاميرات للشو الإعلامى، وعدد ثلاث منصات لمؤتمرات صحفية وكمية من التصريحات النارية، وعدد من الشعارات لا بأس به من نوعية "بوس الواوا .. خلى الواوا صح".. حد ناوى.. حد عايز؟ .. كله عندى فى الجراب.. كله بكيا.. يلا بكيا.. يلا بكيا.. حد عندوا بكيا للبيع.. طب حد يشترى؟!.. ميعادنا بكرة وبضاعة جديدة فى الجراب!!