روبابيكيا للبيع.. ما بين الثورة والانقلاب

ما بين الثورة والانقلاب يا قلبي لا تحزن، بجد الوضع كده بقى صعب جدا أنا مش هتكلم عن شيء حاليا سوى الدراسة لأن مثلا الأسعار الجنونية زي ما احنا عارفين طول عمرها خارج السيطرة فمش هنتكلم عليها، ناهيك عن الفساد والمرور.. إلخ.. إلخ.
لكن مينفعش منبصش للدراسة "مستقبل اخواتنا واولادنا ومستقبل البلد" تكون هي كمان خارج السيطرة والمفروض إن دي حكومة ثورة يعني قراراتها ياريت تكون أكثر حزما وفاعلية، ويا رب ينوب التعليم منها جانب.
تعالوا بقى نتكلم عن الدراسة، وفوجئت لما شوفت "طلاب ضد الانقلاب"... "انقلاب".... "انقلاب" العبارة دي سمعتها كتير اوي، شوف يا عزيزي القارئ معنديش مانع انك مصدق إن ده انقلاب مش ثورة دا موضوعك لو انت مكنتش شايف الملايين اللي نزلوا الشارع فده أمر يرجعلك مفيش حد هيقدر يحجر على راي أو تفكير حد.
تعالوا بقي للشعارات "لا تعليم في ظل الانقلاب العسكري" براحتك برضو متتعلمش ده شيء يرجعلك دي مصلحتك ودي حياتك وانت اللي المفروض تستفيد بالتعليم ده لكن انك تبهدل الدنيا في الجامعات والمدارس كل يوم بالشكل ده وتعمل فوضى بالطريقة دي عشان متتعلمش في عهد "الانقلاب" وعاوز كمان الطلاب العاديين اللي جاين يتعلموا انهم ميتعلموش وتمنعهم اهو ده اللي مينفعش أبدا.
عاوز تتظاهر يا سيدي براحتك ده حقك وترفض الانقلاب وترفض الثورة الشعبية لكن مينفعش كل يوم الاقي 15 في جامعة المنصورة مصابين و34 في جامعة الإسكندرية مصابين ومش عارف كم في جامعة ايه؟ ده غير الخسائر المادية وحالة الرعب اللي بتعيش الطلاب فيها ما دي مش طريقة تعليم عاوز تتعلم اتفضل عاوز تتظاهر براحتك لكن ساحات الحرم الجامعي تتحول لحرب شوارع ده كلام مينفعش وميصحش.
نيجي بقى للطلاب اللي بيتظاهروا تاييدا للجيش برضو حقك تتظاهر تاييدا للجيش ولثورة 30 يونيو وتدافع عن جيشك ده أمر طبيعي عشان يبقى فيه حراك سياسي بين الطلاب وعشان نتعلم إن فيه" راي وراي آخر" بس مش لازم يا سيدي تتظاهر في المكان اللي بيتظاهر فيه جماعة "طلاب ضد الانقلاب" انا عارف انهم بيستفزوا كتير منكم لكن اتظاهر في أي يوم تاني أو في أي مكان تاني داخل المجمع على الاقل عشان متحصلش مشاحنات بينكم وبين بعض حاول تحتوي انت الموقف.
وكلمة بسيطة لإدارات الجامعات مع احترامي الشديد لحضراتكم لكن لازم يكون فيه انضباط أكثر من ذلك مش بمنع الطلاب من ابداء آرائهم السياسية لكن أي طالب يحاول تعطيل الدراسة أو اثارة الذعر والرعب بين الطلاب لابد من معاقبته واخذ كل الإجراءات القانونية معه مع حرية الطلاب لابداء ارائهم السياسية وتشجيعهم على ذلك لكن أن حضراتكم تتركوا الأمر هكذا فعلا الطلاب والشباب عندهم طاقة وحماس كبير فسنجد كوارث عديدة ولا يحمد عقباها وكل يوم هنشوف اصابات لا حصر لها وده غير أن اللي بيتصاب وبيخرج من المستشفي بالسلامة بيكون عنده دافع قوي انه ينتقم.
في النهاية نحن شعب دائما ما يصنع الحضارة والثقافة والرقي ثم يصدرها إلى باقي العالم، هيا بنا نبدأ... تحيا مصر.