«روبابيكيا للبيع»: فوضى المواصلات

يا تري نبدا منين؟ ،،، منين؟ حياتنا كلها مشاكل مبتكلمش عن المشاكل الشخصية أنا مليش دعوة بيها، أنا بتكلم عن مشاكلنا العادية اليومية وأنت في الشارع أو في السوق ولا حتى في المواصلات
ياترى إيه هي مشاكلك ولا إيه اللي مش عاجبك مثلا زي الزبالة في الشارع ياعم اللي بقت حاجة تقرف ولا الزحمة الخنيقة وعلى مابتوصل المشوار اللي انا عاوزه يكون طلع... "مشيها عيني" ولا البلطجة اللي في الشارع ولا ولا ولا.....!!!!
أقولك خد المثال ده عندك، اليوم هو أول أيام العيد، هتبص تلاقي السواق عاوز تقنعني أنك يوم الأحد أو يوم الاتنين دا تاريخ ويوم التلات اللي هو النهارده دا تاريخ تاني خالص الراجل الضلالي بيزود الاجره للضعف ولو مش عاجبك انزل..... تقوله يا اسطي والله مش بهاجمك بس لازم برضو تراعي اخوك تراعي اللي متغرب سواء للعلم أو للشغل ده اصلا مش لاقي ياكل فبلاش استغلال بقي ربنا يوسع عليك وعلينا.
طب وبعدين ياجدعان هنسكت على كده........ هنسكت على كده إزاي يعني؟ طب ما ده أمر واقع واحنا موافقين على كده وساكتيين فعلا انت مبتشوفش ولا ايه؟
لازم نقاوم كل المظاهر السلبية دي هنتناقش فيها هتلاقونا معاكم في السوق والمواصلات وفي كل حته هنتكلم لازم نتكلم لو متكلمناش يبقي نستاهل كل اللي بيجرالنا انا معاكم أن الحكومات ليها دور في كل اللي بيحصلنا ده بس برضو احنا كمان لينا دور في ده.
يا تري هنقدر نوصل لمشاكلنا بجد ونحلها، أنا سامعك ياللي هناك بتقول والله ما هيحصل حاجة وهنفضل كده على طول واحنا شعب تيت ونستاهل اللي يحصلنا.
يا راجل بجد انت شايف كده يبقي انت اكيد اكيد مش في مصر ثورتيين في سنتيين قعدنا شهريين بنغير ولا حكومة ولا نظام ولا شرطة وما اكلناش بعض ولا قطعنا من لحم بعض بالعكس انت موقفتش في لجنة شعبية لحماية بيتك وبيت جارك؟ اهو دي بقي بالذات تثبت اننا شعب متحضر ومحترم فيه سلبيات كتير اوي انا معاك أساسي بس برضو لو صمننا اننا نوصل هنوصل باذن الله لازم نوصل.
اسمحولي اطل عليكم ببعض الكتابات لنناقش مشكلة مشكلة وهنشوف ممكن نتعامل معاها ازاي؟ ايه اللي المفروض نعمله وايه اللي مش من المفترض أنه يحصل اصلا.