"العادلي": السيسي "صاحي" وبيجدد دم الجيش.. وممدوح شاهين "إخواني"

قال وزير الداخلية الأسبق حبيب العادلي، إن "وضع الجيش أصبح مختلفاً بعد تولي الفريق أول عبد الفتاح السيسي وزارة الدفاع"، مضيفاً أن "السيسي بيجدد دم الجيش وصاحي".
وفي التسجيلات الصوتية التي انفردت بنشرها الزميلة "اليوم السابع"، يقول طبيب العادلي الخاص: "أنا شايف إن الجيش بدأ يقفل في الأنفاق".. يجيب العادلي "ولسه".. ثم يسأله الطبيب "الأنفاق دي احنا كنا سيبنها إزاي؟!".. يرد العادلي "الأنفاق دي تبع الجيش الحدود تبع الجيش".
ويكمل العادلي "الجيش تقدر تسميه بقي من بعد السيسي ما قبل السيسي كان وضع تاني احنا كجهاز أمن الدولة كنا بنبلغ كل يومين عن نفق وهما كانوا بيدمروا.. لكن بيقولك نستفيد من بتوع حماس ونستفيد من البدو".. يقاطعه الطبيب "ازاي الجيش سايب الحدود كده مفتوحة مع إسرائيل وغيره كان لازم يقفلوها كويس".. يرد العادلي "ما هو التاريخ مش هيسبهم ده غير حكم ربنا طبعا.. ده الجيش الأولاني الناس كبيرة في السن لكن بعد السيسي الوضع مختلف شوف لما القيادة تبقي أصغر منك".
يقاطعه الطبيب "أنا شفتله صورة في الأهرام أثناء التدريبات العسكرية أمام فرق الصاعقة ووراه الجنود".. يرد العادلي "اه ما انا كنت بشوفه أصل أنا كنت متابعه في حركته لما كان في المخابرات الحربية ده بيجدد دم الجيش وصاحي".. يقاطعه الطبيب "بس طلعت عليه إشاعة انه إخوان".. يرد العادلي "لا مش إخوان هو متدين شوية".
يستكمل الطبيب "طيب ما كلنا متدينين فيه عيلته حد واحد إخوان تقوم البد كلها تشك فيها إنه إخوان".. يرد العادلي "اللي مرتبط بالإخوان مستشاره القانوني" في إشارة إلي اللواء ممدوح شاهين، يقاطعه الطبيب "اه ما سيادة الرئيس في إشارة إلي مبارك قالي إن ابنه متجوز بنت ابن عم الكتاتني باين".. يرد العادلي "آه انت بتشوف الرئيس".. يجاوب الطبيب "آه لذيذ سيادة الرئيس لما يقعد يتكلم عن حكاياته وتاريخه.. يرد العادلي "آه".