قرار.. سأظل محترما

أريد أن أعبر عن حزنى وأسفى الشديد وأنا بكتب هذا المقال، لأني لازم أتعلم بقى، ليه الناس مش بتعاملني زي ما بعاملها، دايما بخاف أزعل اللى قدامى ولو بكلمة واحدة وهما يزعلوك بألف كلمة !!
ليه مبيرعوش انك مؤدب معاهم وبتحاول متزعلهومش وهما يكسروك عادى ؟!!! ليه الناس بقت وحشة وقاسية أوى كدة ليه كل ما تفكر تساعدهم أو تعمل خير لله يفتكروا أن قصدك مصلحة أو تاخد منهم اللقطة ويحاولوا يضايقوك ويخلصوا منك، ليه وألف ليه !!
أنا مبقتش قادرة افهم الدنيا دى !!! لكن يظهر زى ما بيقولوا الحلو ميكملش والدنيا مصالح والمصالح تتصالح وانسى بقى الإنسانية والأخلاق والصدق وحب الآخرين وحب الخير ليهم...
لا لا لا انسى الكلام ده اللى بقى يعمله دلوقت بقى يقولوا عليه عبيط !!!!، ده انت حتى لو غلطت مع أنه والله لو حصل بيكون من غير قصد، طب ما يوجهوك ؟!! طب ما ينصحوك !!!.
بلاش حتى عشان خايفين على مصلحتك اهو ثواب في الآخرة !!! بس ما زلت بقول الناس خلاص نسيت الآخرة ومصرة تتوه في زحمة الدنيا..
بجد الواحد معدش قادر يتحمل قلة ذوق بعض الأشخاص ودايما الوجع ييجى من الناس اللى كنت شايفهم اخواتك وأحسن ناس في الدنيا وقدوتك..
يا ألف مليون خسارة على الأخلاق والقيم ومراعاة الآخرين اللى بقت تداس بالرجلين، يا خسارة على الناس اللى بقت تستخسر حتى الكلمة الحلوة.. يا ألف مليون خسارة على الدنيا اللى بقت عاملة زى الغابة....
خلاص عاوز تعيش لازم تبقى أسد مفترس آه ما الدنيا بقت كدة.. طب اللى مش عارف يعمل إيه بقى ؟؟!!! خلاص لازم تعيش في تعب وحزن طول حياتك.. هو ده بقى القانون الجديد !!!! بس "لا" ربنا يمهل ولا يهمل.... ومحدش هيتحاسب معاك في آخرتك...
أنا هكمل على مبدأى ومحدش فينا ملاك وأكيد أنا مش ملاك بردو بس على الأقل عمرى ما فكرت أذى حد أو أضايق حد ولو عملت بيكون من غير قصد وبفضل ألوم نفسي مييييت مررة بعدها ومرتحش إلا اما اعتذر مرة واتنين وتلاتة..