لجنة الخمسة وخمسين !

بما أن يعني فيه ناس زعلانة من لجنة الخمسين زي ما فيه ناس كتيرة فرحانة بيها وده الطبيعي بتاع الشعب المصري اللي غلب كل الشعوب في أنه بيختلف على كل حاجة.
وبما أن لجنة الخمسين نفسها دلوقتي مختلفة على مكان انعقاد اللجنة وكيفية إدارة اللقاءات وناس تانية مش عاجبها الدكتور عمرو موسي أنه يكون رئيس اللجنة وهو كده مش عاجبهم تيجي تسألهم ليه.. تلاقي ما عندهمش إجابات وحاسين أن ده اعتراض لمجرد اعتراض.
وأنا كفريسكا كمان لي رأي في موضوع لجنة الخمسين ده.. لأن اللي فكر يعملها لجنة الخمسين كان غلطان.. خمسين واحدة مش كفاية.. لأن شكلهم فعلا محسودين وواجب تبخيرهم بالبخور الجاوي بالمستكة والحبهان وواجب علينا كمان نعملهم عروسة ورق ونخرمها يجي 50 خرم ونرميها تتحرق في البخور عشان نقتل عين الحسود.. أو أقترح يشيلوا الصفر اللي ع اليمين ده ونحط خمسة كمان فيبقي 55 وأهه يمكن عين الشيطان تتخذي شوية واقتراح كمان.. خدوني في الخمسة الجداد دول.. هاعمل توزان نوعي بين اللي هيكتبوا الدستور لأن ما فيش حد بيمثل "الفرسكاوية" في اللجنة.
وإغفالنا شيء لا نسكت عليه أبدا !