الشيخ القرضاوي.. "قطراوي" الهوية "دولاري" الماهية..!

كنت مسترخيا على أريكة غرفة المعيشة أشاهد التليفزيون وبجواري "المفعوص" أبو نص لسان، يحشر نفسه فيما يخصه وما لا يخصه.. وذلك في إطار سياسة "الغلاسة" التي لا تنتهي إلا بإخراج "حتة بخمسة" لشراء عصير "كابي" و"شيبسي عائلي".
المهم.. وبينما أنا أتنقل بين القنوات ب"الريموت كنترول" استوقفتني فتوى "متلفزة" للشيخ "القرضاوي" من العاصمة القطرية الدوحة تقول: "إن النزول في مظاهرات الإخوان فرض عين على كل رجل وامرأة وطفل".. وهنا بادرني ابني أبو نص لسان قائلا:
- مش هو ده الشيخ الدكتور يوثف القرضاوي، رئيث الاتحاد العالمي لعلماء المثلمين..؟
- أيوه يا لِمِض..
- وفضيلته قاعد في "قطر" ولّا في "مثر"؟!
- وتفرق معاك في إيه؟
- تفرق كتير يا حج.. اللي بره مش زي اللي جوّه.. واللي بيشيل الطين من ورا كل اللي بيحثل هما الناث الغلابة، اللي ميعرفوش غير تراب البلد دي.. اتولدوا فيها.. وعاشوا على أرضها.. ووقفوا في طوابيرها.. وشربوا من مية مجاريها.. وأكلوا من عيشها أبو شلن اللي مليان من خيرات ربنا.. خشب وثراثير ومثامير.. وفي الآخر ماتوا وملقوش تمن حباية إثبرين..
- بس فيه ناس قاعدة بره وبتحب مصر وبتخاف عليها برضوا زي اللي قاعدين فيها ويمكن أكتر..!
- طبعا يا حج.. بث أعتقد أن الشيخ "القطراوي" مش منهم..!!
- تقصد الشيخ "القرضاوي"؟!
- مش فارقة كتير.. آهو "قرضاوي" النشأة "قطراوي" الهوية "دولاري" الماهية.. يعني بيقفش بالدولار.. وأهم حاجة إنه كل "حين ومين" يقول كلمتين يثخن بيهم الشعب وهو قاعد "معزز مكرم في الدوحة".. ولا عمرنا شفناه أو ثمعناه بيجيب ثيرة قطر أو الشيخة "موزة" بكلمة وحشة.. كل اللي عليه إنه بيثخن أمريكا على "بشار الأثد".. وثايب إثرائيل طايحة في الفلثطينيين..
- أكيد الراجل بيفتي على أساس ديني!
- لا ديني ولا دينك.. دا دين أمريكا وقطر.. ولما هو متنحرر أوي كده.. ليه مبينزلشي المظاهرات بنفثه؟!
- دا راجل كبير.. والسن له حكمه..!
- طيب بلاش هو.. يبعت عياله بدل ما هو عاوز العيال الثغيرة تشارك في المظاهرات هما والنثوان.. قال إيه عشان يكونوا "دروع بشرية".. دا راجل باين عليه "كبر وخرف"..!
- حاسب اوعى تغلط أكتر من كده.. ومتنساش إن لحوم العلماء مسمومة..!!
- مثمومة ولّا مشمومة.. كبر دماغك.. العالم اللي بيخدم الحاكم على حثاب شعبه ميثتحقش الاحترام.. العالم اللي ينعي شهداء الإخوان، وميفتكرش شهداء الثورة بكلمة ميثتحقش الاحترام.. العالم اللي بيقول فتاوى تفصيل ويبيع الشعب على أول محطة ميثتحقش الاحترام.. العالم اللي بيأيد جماعة إيديها ملطخة بدماء الشهداء ميثتحقش الاحترام.. العالم اللي يفكر إن "قطر" هي التي ترزقنا لا يثتحق الاحترام..
- صل على النبي واهدى شوية.. انت دخلت في الراجل شمال كده ليه..!
- ما هو من كلامه اللي يفور الدم ويثمم البدن.. مش كفاية راضيين بالهم والهم مش راضي بينا..!!