يوميات مواطن مخنوق.. حلقة رقم (11).. جارى الإخوانى مش راضى يسمع كلامى

شاء حظك السيئ أن يكون لك جار "إخوانى" ومنذ عزل مرسي وهو يبص لك من تحت النضارة بغيظ وزعل وقرف حتى السلام لا يرده عليك.
تسأله هو انت زعلان منى؟
يرد عليك بكل برود ليه هو انتم عملتم حاجه تزعل أبدا.
ويقولك بقى مرسي الراجل الطيب الخدوم اللى عمر "العيبة" ما طلعت منه يتعمل فيه كده.
ومبارك يقعد على قلبنا 30 سنة يعنى جات على مرسي ووقفت.. ده يرضى ربنا مش عيب.
تلاقى نفسك هتفرقع من الغيظ تسأله هو انت زعلان قوى كده ليه هو مرسي كان هيتجوز خالتك ولا كانت فيه ترقية؟
تبص تلاقى دموعه نازلة زى المطر ويطلع منديله القماش ويقولك يا خسارة هانت عليكم العشرة وطردتم الراجل الطيب الحنين آه يا حبيبى يامرسى كان نفسك تبقى ريس وتروح وتيجى يا غالى.
تضحك وتقوله طبعا هو المفروض كان "سكتنا ورضخنا" لرغبات الإخوان ونبقى عبيد للمرشد والشاطر.
يلطم على وشه ويقول كان صبرتم عليه يقعد حتى "نص" المدة اللى قعدها مبارك ولا "ربعها" والمرشد والشاطر كانوا ناويين يغيروه بعد 8 سنين والله. .ويصرخ بصوت عالى وبعدين المرشد وعدنا إن الحكم هيبقى حق لكل أولاد الإخوان.
لكن نعمل إيه في غباء الشعب اللى طلع يوم 30_6 وضيع الحلم علينا.
بفضول قهرى تسأله ليه ياعم هي عزبة المرشد ولا الشاطر؟
ياعم. انت فاكر إن الناس دى كلها طالعة عشان مرسي لا طبعا.
كل واحد يا باشا طالع عشان نفسه وابنه وتفتكر أن مرسي أصلا فيه حد في الإخوان يعرفه غير القيادات مستحيل هو مين مرسي ده لكن الحلم أن ابنى يبقى رئيس جمهورية هو سبب طلوعى أنا وغيرى في المظاهرات.
وتحس أن مخك خلاص هيضرب تقوله طيب وناويين تعملوا إيه؟
يطلع لسانه ويقولك ولا حاجة هنعمل إيه يعنى؟
الأمر جاءنا إننا كلنا نحلق الدقون ونعمل نيولوك جديد زى "الحبيب أبو حجازى" على أمل أن الشعب يغلط تانى وينتخب واحد إخوانى وييجى العيد ونلبس جديد والحلو قوى في الشعب المصرى أنه طيب قوى بينسى بسرعة.
تلاقى نفسك مجبر إنك تنصحه وتقوله يا أخى دى بلدك وده وطنك سيبك من الإخوان وخليك مع مصر.
تلاقى وشه جاب "أحمر على أصفر على أخضر على أبيض" ويصرخ انت عايزنى أخرج على "البيعة" وعايزنى أكون "عاصى وعاق" انت عايز ربنا يدخلنى النار..
لا ياعم مستحيل ده كلام غلط أعوذ بالله من الشيطان الرجيم.. اسمع.. من النهارده صباح الخير يا جارى انت في حالك وانا في حالى ولا أقولك من غير صباح.
ويكلم نفسه أنا أخرج على "بيعة المرشد " مش ممكن ده الإخوان "يقطعونى ومش بعيد يهدروا دمى" لا لا مستحيل وكمان عشان أخرج من الإخوان لازم أكمل "عشرين سنة" وبشرط اختار تيار إسلامى تانى عشان أحول ليه.. لا الموضوع مش سهل الناس فاكره إيه دخول الإخوان زى خروجها ابدا.
وهنا تصرخ صرخة يسمعها كل الإخوان: أنا مخنووووووووووووووووق !!