أنا أسف يا "مرسى"

لو رجعت بالذاكرة فلاش باك كده لورا.. افتكر كويس بعد يوم 11 فبراير 2011 ظهرت صفحات كتيرة على الفيس بوك بتقول للرئيس الأسبق _عشت وشفت إننا بنقول الريس الأسبق على واحد لسة عايش ما ماتش_ حسني مبارك.. زي مثلا صفحة أنا أسف يا ريس.. أو حتي اعتبره أبوك يا أخي..
الغريب بقي أن الإخوان وأنصار وحبايب الرئيس السابق -مش الأسبق- محمد مرسي العياط مصممين أنه هيرجع هيرجع وعايشين حالة إنكار تامة وكأنهم في حلم كبيير مش قادرين يصحوا منه.
بس ما حدش من الناس التانية طلع وقال أنا أسف يا مرسي.. ولا اعتبره أبوك يا أخي.. ولا حتي " اعتبره عيل وغلط " كل الناس كفت ع الخبر ماجور " وكسرت وراه زير " وقررت إنها تشيله من ذاكرتها وكأنه ما كانش موجود أصلا.
بس أحب أقولكم حاجة مهمة بقي
إننا لازم نقوله إحنا أسفين يا " مرسي " لإنك لو كنت لسة موجود وإحنا عندنا الحظر ده.. أكيد كنت هتبقي فاضي وتطلع تقولنا خطب تضحك.. وتعد عنينا رايحة جاية مع صوابعك وأنت عمال تبلها وتقلب في الأيباد..
أنا أول واحدة اضريت بسبب غيابك يا " مرسي " حقيقي قطعت بيا.. كنت باطلع من خطابك يجي ب13 مقال ساخر كل يوم من يوم ما مشيت والضحك بقي شاحح في السوق.
وقال على رأي المثل " قرد يسليني ولا غزال شارد " عموما الحمد لله إنهم اخترعوا النت والتسجيل اهه لما توحشنا نتفرج عليك في "القفص " قصدي يعني في اليوتيوب " !