كنباوية في قمة سعادتها منذ الصباح الباكر فور سماعها خبر القبض على صفوت حجازي أثناء محاولة هروبه إلى ليبيا عن طريق السلوم مرسي مطروح، وكنباوي يلحظ فرحتها فيقترب منها مداعبا.. كنباوي: صباح الورد على الياسمين، صباح الفل على الرياحين صباح الرضا والبهجة على أحلي زوجة في الدنيا، صباح الود والأمل والتفاؤل كنباوية: أحلي صباح في الدنيا عليك ياقلبي كنباوي: إيه اللي مفرحك كده ؟ كنباوية: قبضوا على الواطي المنافق الخاين أبو وشين صفوت حجازي قبضوا عليه امبارح وهو بيحاول يهرب لليبيا وصابغ شعره وحالق دقنه وعامل نيولوك دوجلاس وصابغ الدوجلاس ولابس لبس بدوي ومعاه دولارات وريالات سعودي الراجل اللي كان بيقول احنا حنقدم لكل أم مشروع شهيد كان سايب البلد ومسافر هربان لليبيا زي الفيران.
كنباوي: مالبسش نقاب ليه زي المرشد ؟ كنباوية: لأ النقاب لكبار التنظيم والنيو لوك للصبيان وحجازي راح ولا جه صبي للإخوان اللي يضحك ياكنباوي إنه كان بيقول على القدس رايحين شهداء بالملايين والعيال النهاردة بيتريقوا عليه ويقولوله على ليبيا رايحين هربانين شعرنا صابغين.
كنباوي: الله يكسفه راجل كداب دفع بشعاراته الغبية مئات المعتصمين للموت في رابعة والنهضة وفي الآخر هو هرب وكان عاوز ينفد بجلده كنباوية: بكره يقرروه على كل حاجة كانت خافية علينا كنباوي: يابنتي ده من أول قلم قال إنه برىء من الإخوان وإنه مش إخواني وبرىء منهم وأنكر كل شيء عمله وقاله في اعتصام رابعة وقال إنه لو يعرف إن في رابعة سكينة بلاستك كان ساب الاعتصام.
كنباوية: الواطي بكرة يطلب تخفيف الحكم عليه واعتباره شاهد مالك مقابل إنه يقول معلومات عن البلتاجي والعريان وعاصم عبد الماجد كنباوي: وفكرك ينفع إنه يبقي شاهد مالك ؟ كنباوية: لا طبعا دول حينفخوه بعد مايقرروه وهو حيخر ويكر كل الشريط زي ماحصل بالظبط. كنباوي: بيقولوا إن من طبعه النفاق والخيانة والبيع من أجل مصلحته واستخدام الدين لخدمه أغراضه كنباوية: الله يلعنه في كل كتاب كنباوي: بكرة الباقي يقع ويمسكوا البلتاجي أنا عارف إن ده حيفرحك أوي وأنا نفسي تفرحي من قلبك ومصر النهاردة كلها فرحانة بالقبض على حجازي كنباوية: أنا سامعة كمان أن جهة سيادية قبضت على حسن مالك ممول الإخوان المسلمين كنباوي: أنا كمان سمعت نفس الخبر بس فيه تعتيم عليه رغم أن فيه جريدة نشرت الخبر كنباوية: المهم مصادرة أمواله والمهم كمان إنهم يقبضوا على محمود عزت رأس الحية دلوقتي كنباوي: أنا سامع إن محمود عزت قاعد في سينا مش هنا كنباوية: سينا مصر إسرائيل لو الجيش عاوز يجيبه هو والمخابرات حيجيبوه حتي لو اشتروه واشتروا القبض عليه حتي بالفلوس كنباوي: عندك حق الفلوس بتعمل كل حاجة وأي حاجة الفلوس سرها باتع كنباوية: طيب إيدك على 500 جنيه علشان الفلوس اللي معايا خلصت كنباوي: بس كدة انتي تؤمري ياقمر 500 ألف ولا يهمك ربنا ساترها معانا على وش الواد اللي جاي في الطريق بس ليا شرط قبل ماتاخدي الفلوس كنباوية: انت ماتشرطش انت تؤمر ياكنباوي كنباوي: الأمر لله أنا عاوز صينية كنافة حلاوة القبض على حجازي كنباوية: بس كدة صنية كنافة وصينية بسبوسة كمان كنباوي: ده يبقي كرم منك كنباوية: مش حيكون أكتر من كرمك ياكنباوي وخيرك كنباوي: ربنا مايحرمنا من بعض كنباوية: آمين يارب العالمين !
