مصر والإرهاب وجهان لعملة واحدة!

مصر والإرهاب وجهان لعمله واحدة، والنبي استنوا عليا لحد ما اخلص كلامي، على مر العصور ومصر والإرهاب وجهان لعمله واحدة فعلا، وجه للخير والعمار والانسانية والحضارة، أما الوجه الثاني فهو الإرهاب الفكري والنفسي والعسكري اللي الجميع بيحاولوا يوقعوا مصر فيه على مر العصور، لكن إرادة الله أقوى من أي شيء.
مصر مذكورة في القرآن والنبي محمد عليه الصلاة والسلام دعا ليها، وأكد أن أبناءها هم خير أجناد الأرض، مصر مش هتقف عند الإخوان، أتمنى أن الناس تقرأ التاريخ وتفهم يعني إيه مصر وإزاي هي مقبرة الغزاة اللي مقدرش عليها حد.
مصر أم الدنيا وهتبقى قد الدنيا، ده مش كلام، إحنا الشعب الوحيد اللي معروف أصله من 7000 سنة، اذكر أن ليا صديق من الصعيد الجواني، لما بقعد معاه بيقعد 14 دقيقة بالتمام والكمال يقول اسمه ابا عن جد، بيوصل لحد الجد ال70 أو ال80، يعني إحنا عندنا عائلات في مصر أقدم من أمريكا اللي جاية تعمل علينا دولة.
مبحبش أتكلم عن أمريكا بشكل مهم لأن إحنا اللي ادناها أكبر من حجمها، ياريت نعرف قيمة نفسنا، ياريت نعرف أن إحنا أقوية بجد ونستاهل الخير بس على كل واحد يبدأ بنفسه ويدور جوا منه على شيء صح، إحنا شعب نستاهل نعيش في أمان وخير، لكن يوم ما ييجي فصيل حقير يهدد أمن بلادنا مفيش أي مشكلة إننا نردم عليه القبور ونرجع من بعده نعيش في بساتين الحق والخير.. تحيا مصر.