المتحولون

- محموووووووود
- عاوزه إيه ياستى ؟!!
- انتخابات البرلمان قربت يامحمود ياحبيبى
- واحنا مالنا ياستى، ماتخلينا ف حالنا أبوس إيدك
- مش هتطلع تقلب عيشك ياحبيبى
- أقلب عيشى ؟!! واقلب عيشى إزاى بقى ياأم العريف ؟!! هااسرح أبيع قوايم مرشحين يعنى ولا أعمل إيه ؟!!!
- ومالك متعصب عليا كده ليه يا حبيبى؟
- لا متعصب ولا حاجه ياستى اتكلمى بقى ابوس رجلك، خنقتينى .!!
- بعد الشر عليك أحبيبى، انشالله عدوينك يامحمووووووود
- طيب شكرا يامراتى ياحياتى، ها اتكلمى بقى.. ورايا شغل عاوز أخلصه، أقلب عيشى إزاى ؟!!!
- تطبل للإخوان ياحبيبى!!
- بتقولى إيه ياوليه ؟! عاوزانى أنا على آخر الزمن أشتغل مطبلاتى ؟! طب وشرفى وتاريخى الوظيفى لو ما اتلميتى لتكونى مروحة عند أمك دلوقتى.!!
- ما هو كلهم بيعملوا كده يامحمود ياحبيبى
- بيعملوا إيه ياوليه إن شالله تعدمينى
- بعد الشر عليك يامحموووود ،شفت العريان ياحبيبى .!!
- واحنا مالنا بسيرة الناس ، ومالنا ومال العريان دلوقتى فى السقعة دى؟!!
- ماهو بيتكلم ف الرايحة والجاية يامحمووووود ، وهيرجعلنا اليهود تانى ياحبيبى .!!
- وانتى مالك بالعريان ياستى ، مش انتى لابسة دلوقتى ؟!!!
- الله بقى يامحموووود ، ماهو اللى بيقول ، وأنا اش عرفنى ؟!!
- طيب ياستى ماتزعليش لما أشوفه هاسأله بيعمل كده ليه ؟! ، المهم خلينا فى موضوعنا بقى ياستى ، إزاى أطبل للإخوان ؟!!
- أنا قصدى ياحبيبى تشوفلك قناة وتطلع عليها تشتم الناس والمعارضة وجبهة القوقاز الوطنى.!!
- اسمها إيه يا حبيبتى
- جبهة القوقاز الوطنى
- الإنقاذ الوطنى ياروحى ، الإنقاذ الوطنى ياحياتى .!!
- وأنا عارفة ياخويا ؟!! ما الجبهات كترت فى البلد ، أنا هاحفظ إيه ولا إيه ؟!!
- وانتى فكرك لما أطلع على قناة وأعمل كده ويحبونى الإخوان ؟!! طيب بقية الشعب هيعملى إيه بقى ؟!! ده هيضربونى بالجزمة ياولية !! ولولوا عليكى بدرى يابعيدة ، وجاتلك منين الفكرة المنيلة بستين نيلة دى ؟!!
- ما أنا شوفتهم بيعملوا كده على قناة الحافظ يامحمود ياحبيبى ..!!
- هم مين دول اللهى أعدمك بدرى ؟!!
- دول 3 من المتحولين كانوا بيطبلوا ويردوا على بعض ياحبيبى
- ورئيس القناة سابهم يشتموا ف الناس كده وخلاص ؟!!
- ما هو كان بيرقص معاهم ياحبيبى..!!!!