بالرغم من إني زعلانة والله أن بعد ما "هوجو شافيز" مات وبلده اتقلبت كده فوقاني تحتاني وفنزويلا اليومين دول ما بقتش فنزويلا بتاعة زمان.. قال يعني المواطن العادي في الشارع المصري اللي بيفطر بجنيه فول الصبح و5 أرغفة بلدي من أبو 5 قروش عارف مين هو هوجو شافيز أو فين بالظبط فنزويلا.. ده انا لو سالت واحد فيهم على غيار الريق كده على عربية الفول مش بعيد يفتكرني باشحت فطار بطريقة جديدة ويحن عليا بطبق فول بالزيت الحار. لكن اللي مزعلني أكتر من تغيير فنزويلا هو انهم يسحبوا السفير بتاعهم من عندنا ! لا يا راجل هو احنا أصلا عندنا سفارة لفنزويلا..يلا بقي الله يرحمه الزعيم عبد الناصر كان فاتح قلبه وبيته للي يسوا واللي ما يسواش.. قلبه كان كبير بس هنعمل إيه بقي ! وكمان بيقولك إن فيه دولة اسمها" الإكوادور" هي كمان سحبت سفيرها من مصر.. حد يقولنا طيب هي الإكوادور دي فين عالخريطة ؟ طب فيها كام واحد ساكنين ؟ وكام " إكوادوري بيجوا مصر كل سنة ؟ وبييجوا يعملوا إيه ؟! يعني طيب حد يفهمني فيه مصريين هناك ؟ ولو فيه.. الإكوادور دي فيها مزز حلوين يعني ؟! الحقيقة في ظل غياب معلوماتي عن دولة " الإكوادور " التي لا أسمع عنها غير في كأس العالم في الدور 32 إذا تأهلت بسلامتها أو في مسابقة ملكات جمال العالم في التصفية الأولانية باحب اتفرج أوي على كل الدول وتلاقيهم برضه جايبين بتاعة الإكوادور دي حلوة كدة وشبه رجل الكنبة.. مش هاقدر افتيكم أوي عن مدي حزني أو فرحتي بعد ما سحبوا سفريهم من عندنا ومش عايزة ازود كلام اكتر من كده عن الدولة دي أحسن انا عارفة فيه بنات منكم هتفتكرني باتكلم عن " الأكوادور " اللي بيتحط على الضوافر الملون ده. كل ما هنالك بقي أنا بناشد الحكومة تلم سفرائنا اللي متبعترين في دول كده مالهاش أي لازمة وبلاش بقي بعزقة في الناس والحقيقة ده بذخ حكومي منهم لإنهم بيعبروا دولا لا يفهمون كينونتها..فيا تفهمونا يا تبطلوا بذخ حكومي بقي !
