مستقبلي كان هيضيع واتفضحت في الجرايد، علي الحجار يروي أسوأ أزمة واجهها بسبب سميحة أيوب (فيديو)

علي الحجار، قال الفنان علي الحجار: "مريت بأزمة نفسية صعبة أوي سنة 1982 في وقت نجوميتي مع محمد منير ومحمد الحلو وعمر فتحي، وقت لما شريط اعذريني باع 4 مليون نسخة في أول سنة".

شطب عضوية علي الحجار من 3 نقابات
وأضاف خلال لقائه ببرنامج "معكم" الذي تقدمه الإعلامية منى الشاذلي بقناة "أون": "أنا كنت في أزمة كبيرة واترفدت من 3 النقابات نقابة المهن التشكيلية ونقابة المهن التمثيلية ونقابة المهن الموسيقية، كان فيه أزمة سياسية حصلت لما قرروا ما يعملوش احتفالات عسكرية لأن قبلها كان اغتيال الرئيس السادات فقرروا يعملوا احتفالات أكتوبر بأنهم يعملوها احتفالات فنية وعملوا مسرحية مجنون ليلى إخراج عادل هاشم وكانت الفنانة سميحة أيوب مديرة المسرح القومي".
الفنان علي الحجار وأزمة 1982، فيتو
بروفات مسرحية مجنون ليلى
وتابع: "عملنا بروفات كتير قرب 3 شهور قبل عرض مسرحية مجنون ليلى في احتفالات أكتوبر، وبدأ يحصل صلح مع الدول العربية بعد مقاطعتهم لمصر بعد معاهدة كامب ديفيد، وقرروا اللي يتعزم في الحفلة وزراء الثقافة والإعلام من الدول العربية لتكون بداية صلح فني، والمسرح اتفتح قبل ما أوصل بساعة ونصف رغم إني رايح في الميعاد المظبوط اللي ماضي عليه".

فضيحة مسرح الجمهورية بحضور رئيس الوزراء
وأكمل: "أنا الوحيد اللي كنت من خارج أعضاء ممثلي المسرح القومي، اتفتحت الستارة الساعة 7 لغاية لما قالوا ها هو قيس قد أتى وبعدين اتقفلت الستارة بعدها بثوان وبعدين الفنان محمود عزمي كان مدير المسرح وقتها طلع وقال: "احنا نعتذر عن استكمال عرض المسرحية لإن بطل العرض علي الحجار ما جاش وفي نصف ساعة نقباء النقابات والوزير بيمضوا رفدي من النقابات الثلاثة".
وواصل: "من غير أي تحقيق تم رفدي من النقابات الثلاثة، ولما وصلت مسرح الجمهورية لقيت مجموعة من شباب الجامعات بيقولوا لي امشي يا أستاذ علي ده فيه كارثة جوا وفضيحة لأن كل الوزراء العرب ورئيس وزراء مصر موجود والعرض اتقفل، كنت هطلع بالعربية تاني خدوني على أوضة وقالوا لي إيه الحكاية اتأخرت ليه ده فيه كارثة، خرجت لمدة 27 يوم بيتكتب عليَّ في كل الصحف والمجلات أسوأ كلام في الدنيا وحاولت أقابل الوزير ورؤساء تحرير الجرايد والمجلات محدش عايز يقابلني ولا يسمع مني لحد لما جاء عصام السيد مخرج مسرحية مش روميو وجوليت وقال لي فيه رجل صالح بيعرف ربنا وله في الطالع وكل لما يقرأ حاجة مكتوبة عنك بيقول أنا حاسس إنه مظلوم وهو مصر يشوفك وافقت اقابله".
الفنان علي الحجار، فيتو
شخص يفهم في الطالع ينقذ علي الحجار
وتابع: "الراجل اللي بيعرف في الطالع سألني عن اسم أمي وقابلته ودخلت قعدت معاه وشربني قهوة وشاف الفنجان وقال لي بكرة هتتحل مشكلتك، وقال لي أنا شُفت راجل طول بعرض أسمر هيبعت يجيبك بكرة الضهر وهيكلموك وهيجيبوا لك ورقة مزورة إنك مضيت على موعد افتتاح المسرحية، صحيت الساعة 11 الصبح تاني يوم لقيت مدير مكتب وزير الثقافة بيكلمني وبيقول لي الوزير منتظرك، والراجل اللي بيفهم في الطالع كان مديني ورقة فيها تحصين أقراه وأرقام ونجوم قال لي اكتبها بقلم أحمر".

براءة علي الحجار من أزمة مسرحية سميحة أيوب
وأكمل: "قرأت التحصين ورُحت للوزير قعدوني في مكان بوزارة الثقافة في الزمالك، ودخلت للوزير كإني عايش كابوس فضلت ماشي كإن المشوار حاجة اسيلموشن، وقال لي هو إيه اللي حصل بالظبط أنا طول الليل فيه صوت بيصحيني بيقول لي أنت ظالم علي الحجار هاته، وحياة القرآن المجيد، فقلت له الحكاية إني رُحت في الميعاد المحدد ليَّ، قال لي بص يا ابني لو كنت رُحت بدري وعرضتم المسرحية كانت ممكن تنجح وقلت له معرفش المسرحية 3 فصول وما نعرفش حاجة عن الفصل الثالث أصلًا ونص الفصل الثاني ما كناش كملناه وبليغ حمدي قال لهم ما تسلموش أنا ما كملتش الألحان بتاعت مجنون ليلى، فالبتالي ما كانش ينفع تتعرض وعملوا حيلة ضدي".

علي الحجار وصلاح عبدالله في "معكم منى الشاذلي" الخميس والجمعة
تفاصيل تقديم علي الحجار ورانيا فريد شوقي ل مسرحية "مش روميو وجوليت"

وأوضح: "وزير الثقافة وقتها قال لي أنا هعمل تحقيق من مستشارين وتجيب ممثلين المسرح القومي كلهم وسميحة أيوب واللي أنت قلته لي ده تقوله رقبتك ولا رقبتهم، قلت له رقبتي طبعًا، مفيش أسبوع عدا إلا والتحقيق اتعمل وخبر براءتي اتعمل في حتة صغيرة بالجرايد".
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.