هل انخفضت أسعار الدولار والذهب بشكل فعلي؟ تعليق قوي من نجيب ساويرس (فيديو)

نجيب ساويرس، علق رجل الأعمال المهندس نجيب ساويرس، على ما يتردد ويثار بشأن تأثير الإعلان عن صفقة رأس الحكمة على تراجع سعر الدولار بالسوق الموازية بشكل كبير وانخفاض أسعار الذهب، قائلا: "كل الكلام ده هجايص ومش صحيح، الفلوس مجتش لسه، الدولار هينخفض سعره الحقيقي أول لما ال 12 مليار دولار يوصلوا".
متى ينخفض الدولار؟
وتابع خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": "محافظ البنك المركزي لما يبتدي يفك إيده شوية على الاعتمادات المتأخرة والبنوك أيضا، فالناس متضطرش تنزل تدور على الدولار بالسوق السوداء، وقتها الدولار هينزل فعليا".

انفراجة في الاقتصاد
وتابع:"يجب أن يكون سعر الدولار محددا وفق العرض والطلب، ودخول 24 مليار دولار للبنك المركزي هيعملوا انفراجة 3 أو 4 سنوات".
نجيب ساويرس مشيدًا بصفقة رأس الحكمة: لو اتعرضت عليا ماخدهاش والأشقاء بيساعدونا (فيديو)
أول تعليق من نجيب ساويرس على توقيع صفقة رأس الحكمة مع الإمارات
إنقاذ الدولة وسداد أقساط الديون
في نفس المداخلة، صفقة رأس الحكمة، أشاد رجل الأعمال المهندس نجيب ساويرس، بإبرام الحكومة صفقة رأس الحكمة مع الجانب الإماراتي، مؤكدًا: صفقة لها وضع خاص ولا أعتقد أنها ستتكرر، وتعتبر فريدة من نوعها نظرا لتوقيتها مع مرور الدولة بأزمة كبيرة في سعر الصرف وسوق مضطرب في العملة وتوقف المصانع وعدم القدرة على تلبية الاحتياجات من أجل الإنتاج وارتفاع أسعار السلع الغذائية والديون التي تقدر ب170 مليار دولار وأقساط ديون مستحقة الفترة المقبلة.
وأضاف: "واضح إن مكنش عندنا ما يكفى لسداد أقساط الديون، فلما ييجي حد وينقذك في الوقت ده فهذا أمر كويس جدا".
سعر أرض رأس الحكمة
وأوضح: "أنا راجعت صفقة رأس الحكمة، ولقيت إن سعر الأرض أعلى من اللي إحنا إشترينا به كشركة في نفس المنطقة، فلما الجانب الإماراتي يجي يشتري منك الأرض وبعدين يدخلك معاه شريك ب35% فهذا أمر لا يصدق إحنا نفسنا مبنعطيش الحكومة أكتر من 27% وبعدين الأهم الرقم هيعمل سيولة دولارية ويخلينا نقدر نسدد كل اللي علينا ونفتح الاعتمادات للناس اللي شغلها واقف، ونقدر نوصل لسعر الدولار الواقعي ودي مؤشرات مالية".
دعم إماراتي لمصر
وأوضح: "الجانب الإماراتي دفع 24 مليار دولار فقط في الأرض وعلشان يبني الأرض محتاج 3 أو 4 أضعاف الرقم اللي دفعه في الأرض، وبالتالي الفلوس دي كلها هتبقى في مشروعات داخل مصر، واستثمارات قوية لصالح البلد، يعني هما دافعين 24 مليار دولار ثمن الأرض ومع ذلك أدخلوا الحكومة كشريك ب35% بصراحة أنا لو اتعرض عليا الصفقة دي ماخدهاش، الصفقة دي فيها جانب إنساني وأشقاء بيساعدونا وشعب طول عمره بيحب مصر وأنا مش بطبل لحد الشعب الإماراتي بيعاملوا المصريين هناك بشكل خاص، وطول عمرهم واقفين ورانا وعندهم قناعة إن مصر بوابة الأمة العربية ولازم يقفوا وراها أيًا كانت المواقف والظروف والمهاترات من اللي فاهم واللي مش فاهم".
ولفت: "كمية المشاريع القبيحة اللي اتعملت في الساحل الشمالي ومساحات الشواطئ اللي باظت الإماراتيين لما يجوا هيخلوا المستوى زي مدينة دبي، لإنهم عندهم فكر متطور ومنظمين واللي ينزل دبي وأبو ظبي يحلف بيهم، وإحنا كمطورين هنعلي من أسلوبنا ونقلل من أسعارنا ونخدم الناس أحسن ولما يجوا يبنوا هيشغلوا كل الشركات المصرية، وهيوفروا فرص عمل كتير والمرتبات هتعلى وهيخلقوا مدينة جديدة على أعلى مستوى نصف الساحل الشمالي وكلنا هنستفيد ومشاريعنا جنبهم أكيد هتستفيد، مينفعش في ظرف زي ده ويجي حد يساعدنا ونيجي نلاقي اللي يفهم وميفهمش يتكلم".
وأشار: "مشاريع الإماراتيين بتبقى مظبوطة وبيستعينوا بمكاتب عالمية تعملهم معمار على أحدث ما توصل إليه العلم وبيعملوا دراسات جدوى على أعلى مستوى، وبيحافظوا على البيئة وهيعملوا مطار دولي في منطقة مفيهاش مطارات للسياحة العالمية، وبيعملوا مدن ذكية وبيطوروا أي منطقة بشكل كبير".
وأكمل: "فيه ناس يقولك هياخدوا أرضنا ده كلام مينفعش يتقال يعني هياخدوها ويرجعوا بيها على دبي ولا أبو ظبي يعني".
صفقة رأس الحكمة فرصة للمراجعة
واستطرد: "صفقة رأس الحكمة يجب أن تكون فرصة للمراجعة، مراجعة كل شيء لإن كل الناس مش راضية عن طريقة الإدارة الحالية، ولا التدخل الحكومي في كل حاجة والقطاع الخاص المخنوق، فيه حاجات بدأت تحصل كويسة ولكن يجب مراجعة كل المشروعات اللي بتتعمل وترتيب الأولويات".
------------------------------------------
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.