يوميات مواطن مخنوق.. حلقة رقم (4)

وفود عالمية وعربية وزيارات رايحة جاية للمعزول مرسي ليه هو مين ابن مين في مصر وليه يحصل معاه كل ده وترجع بيك الذاكرة. وتفتكر أن فيه واحد قعد على نفس الكرسي 30 سنة..
وكتم على نفس الشعب. طلع عين الشعب. وكان على طول عمره يقول حاضر ونعم وعمره الراجل ما زعلهم وفجأة الست أمريكا قالت له مع ألف سلامة والقلب دعيلك يا خبيبي.
وتشوف اللي بيحصل دلوقتي تحس إنك قدام مافيا عالمية وإرهاب دولي وتشك إن الراجل ده ماسك عليهم "ذلة" وتسأل نفسك هي أمريكا بتعمل معاه كل ده ليه؟!
ومن غير وعي وتصرخ وتقول لا لا الموضوع ده فيه إنة.
وتعيش مرعوب أو متهدد من كل اللي حواليك أبو دقن على أبو حواجب على أبو جلابية على أبو أي حاجة.
تبص تلاقي العيون زائغة والعقول شاردة وكل يوم تسمع تهديد جديد إحنا "هنحرق.. هنولع.. هنسرق.. وهنقتل.. وهنعمل أي حاجة وكل حاجة واللي مش عاجبه يروح في ستين داهية".
تحس على طوال إنك عايش الحياة "قسريا" يعنى غصب عنك.
يعني رأيك مرفوض.. يعني مطرود من الاستقرار وراحة البال برضو لو مش عاجبك روح على أقرب بحر واشرب أو اكشف شعرك.. أو في ساعة مغربية.. وادعي عليهم ربنا ياخدهم ويفرق شملهم ويحرقهم وانتظر بقى الفرج.
وتلاقي الشيطان أعوذ بالله من "الشيطان الرجيم" ياخدك على منطقة بعيدة خالص ويخليك تسأل نفسك سؤال مهم قوي "هو محمد مرسي العياط يقرب لأمريكا إيه"؟!
والشيطان برضه شغال يزن ويزن ما صدق ويقولك على فكرة مش بعيد تلاقي "أوباما " بذات نفسه نزل عشان يطلع مرسي ياخده معاه وعلى أمريكا يطير بيه وفي "منت" يا مان يخلص الموضوع..
وتلاقي الشيطان يرجع تاني ويقولك بلاش يا سيدي أوباما ييجي بنفسه عشان الراجل مشغول.
بس مش بعيد تلاقي طيارة أمريكية نازلة فوق المكان اللي قاعد فيه مرسي وتخطفه وتجري بيه على أمريكا وأوباما يطلع لسانه للمصريين يرقص عشرة بلدي ويغني "أخدناه أخدناه والراجل بتاعنا أخدناه".
وفجأة تلاقي اعتصام "رابعة والنهضة" بح خلاص بلا شرعية.. بلا توعية.. بلا نوعية وكل واحد يحط إيده على قفاه ويحس أنه مولع نار من "قلم" المعزول مرسي اللي لسع بيه "قفا" المعتصمين طار على الست أمريكا والأخ أوباما.
ويبعت ليهم "مسيدج" يقول فيها أهلي عشيرتي أحبابي "جزاكم الله خيرا على الواجب اللى عملتوه معايا".
نعرفكم إن أخوكم أوباما عمل اللازم.. نلتقي بعد 60 سنة تاني يمكن نوصل للحكم باي باي مرسي خلاص مش جاي.
تصرخ صرخة مدوية يسمعها العالم كله وتقول.........أنا مخنوققققققققققققققققققققققققققق!