عمرو أديب يوجه رسالة للحركة المدنية بشأن الانتخابات الرئاسية: عايزين معركة انتخابية

الانتخابات الرئاسية، قال الإعلامي عمرو أديب: "يوم 14 أكتوبر هنعرف مين اللي مرشح نفسه ومين اللي هيخوض سباق الانتخابات الرئاسية".

مرشحو الانتخابات الرئاسية
وأضاف خلال برنامج "الحكاية" المذاع علي قناة "إم بي سي مصر": "لحد دلوقتي مش عارفين مين هيرشح نفسه في انتخابات الرئاسة".

توكيلات مرشحي الرئاسة
ولفت: "اللي مش هيعرف يجيب ال25 ألف توكيل من 15 محافظة هيبقى عنده مشكلة في ورقه ومش هيعرف يخوض الانتخابات الرئاسية، واللواء عمر سليمان شخصيا معرفش يكمل ورقه".


مشكلة الحركة المدنية
وأكمل: "الغريب يا سادة إن الحركة المدينة اجتمعوا امبارح وطلعوا ببيان غريب جدا فقالوا حاجة غريبة جدا، أحمد الطنطاوي وجميلة إسماعيل وفريد زهران قالوا إن وارد جدا نتوافق على واحد بس احنا لسه هنشوف، يا خبر أبيض هو لسه فيه وقت للكلام؟ لو حتى 10 لازم يبقى فيه مرشح واحد والكل يدعمه، ولكن دول قرروا أنهم لسه مش حاسمين موقفهم، موقف غريب ومش مفهوم منه حاجة".

معركة انتخابية رئاسية
وتابع: "أنا مش بحرض على ترشيح حد للانتخابات الرئاسية، كل اللي يهمني يبقى فيه معركة انتخابية رئاسية، والوجوه الموجودة في المشهد دلوقتي أفضل من الوجوه اللي كانت قبل كده".

رسائل الوطنية للانتخابات: انتخابات الرئاسة ستُجرى بنزاهة.. نقف على مسافة واحدة من جميع المرشحين.. والمشهد الانتخابي سيكون انعكاسًا لمكانة مصر
الوطنية للانتخابات: ندعو المصريين للمشاركة في انتخابات الرئاسة وعدم الالتفات للشائعات

نداء عمرو أديب بشأن الانتخابات الرئاسية
ولفت: "الرئيس السيسي على ما أعتقد جمع ال25 ألف توكيل ويمكن 250 ألف توكيل، طيب ماذا أنتم فاعلون يا الحركة المدنية علشان تجمعوا التوكيلات؟ أنا حاسس إن جوة المعارضة فيه غيرة من واحد ومفيش توافق على هذا الشخص، أنت داخل الانتخابات ليه؟ علشان تسجل موقف قوي علشان لو مش هتقدر تعمل في الانتخابات دي حاجة يبقى على الأقل أنت سجلت موقف وتقدر تعمل حاجة في الانتخابات اللي جاية، انتو ناويين تخلصوا على بعض، جميلة إسماعيل على فريد زهران؟ ريحني وفهمني، انزل ووريني قد إيه ممكن تعمل فارق وتغييرا لمصلحة الوطن، جائز يكون فيه أفكار مختلفة في الأسعار والأجور والاقتصاد تنفع البلد، ولكن لغاية الآن ما أراه خلافا على منافسة السلطة وليس على السلطة، الدكتور على الدين هلال علمني سياسة وفي يوم دخل وقال لي: أنت، قوم، إيه الفرق بين الحزب السياسي ونادي الجزيرة؟ ودي كانت دفعة فيها جميلة اسماعيل ومجدي الجلاد وياسر رزق، فقال لنا حاجة واحدة الشيء الوحيد اللي يفرق الحزب عن أي كيان آخر أنه يهدف للوصول للحكم، دي شغلانة أي حزب في العالم أنه يكون في السلطة، بصراحة الحركة المدنية اتأخروا جدا وكان المفروض يتحركوا من بدري، يا ريت بقى ميبقاش فيه حركات بلدي في الانتخابات اللي عايز يؤيد السيسي يؤيده ومفيش أي مبرر يتعمل أي شيء غير طبيعي أو حد عايز يخدم أو يتطوع الموضوع مش محتاج خالص إننا نعمل شيء زيادة، أنا عايز المصري يبقى عنده ثقة في الممارسة السياسية ولغاية لما أوصل الانتخابات متيأسنيش بقى، اعطوا الناس فرصة تعبر عن نفسها، تصرفوا بحضارة وعلى قدر تاريخنا اللي خرمتولنا وداننا بيه، وبصراحة أنا مقدرش أتوقع اللي هيحصل الانتخابات الرئاسية، نفسي كمواطن مصري نعمل حاجة جيدة والناس يبقى عندها ثقة في صوتها، أنا مش قلقان من الانتخابات ولكن قلقان من اللي بعد الانتخابات، والناس تلتفت بقى للأهم، الأزمة الاقتصادية، وده أهم من أي حاجة، الأساس في الحكاية الخروج من الأزمة الاقتصادية، عمري ما شوفت انتخابات جت قبل كده علي مصر والبلد كنت في وضع صعب زي دلوقتي".
نقدم لكم من خلال موقع (فيتو) ، تغطية ورصد مستمر علي مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.