أنا اللي دخلت الجيتار مصر، عمرو مصطفى يكشف وجهة نظره في تصريح سابق بشأن الجيتار

عمرو مصطفى، كشف الفنان عمرو مصطفى عن وجهة نظره في تصريح سابق له بشأن آلة الجيتار والذي تضمن "أنا اللي دخلت الجيتار مصر" وذلك من خلال حسابه الشخصي على موقع التواصل الاجتماعي "فيس بوك".
عمرو مصطفى يكشف حقيقة تصريح سابق
وقال مصطفي:"مساء الخير توضيح بتصريحي (دخلت الجيتار مصر )
المقصود من التصريح آلة ولكن الجيتار من قبل ما تولد موجود لدى العبقري عمر خورشيد والفنان الكبير حميد الشاعري، والفنان أخويا مصطفى قمروناصر المزداوي
و أضاف مصطفى:" وده توضيح فقط لإن كله ساب أهداف للحقوق المبدعين ومسكوا في تصريح غير مقصود واتفهم غلط وشكرا.
رامي صبري وعمرو مصطفي
ومن ناحية أخري رد المطرب رامي صبري، على اتهام الفنان عمرو مصطفى له بسرقة لحن أغنيته "رقصة"، قائلا: "أنا مبحبش أتكلم عن زملائي بشكل سلبي، وعمرو المفترض إنه عشرة كبيرة وصديق واحنا أصحاب وعلشان فيه بيني وبينه عشرة مش هرد بطريقته اللي معجبتنيش واللي اتهمني فيها بالسرقة".
توارد أفكار رامي صبري مع عمرو مصطفى
وأضاف رامي صبري خلال لقائه ببرنامج "أجمد 7"، المذاع على إذاعة "نجوم إف إم": "مش رامي صبري اللي يسرق لحن ولو هو يعرفني كويس مش هيتهمني الاتهام ده ممكن يكون فيه توارد أفكار وفيه 10 ألحان ممكن يكون فيهم جملة شبه التانية ومرة عملت أغنية لعامر منيب اسمها ده مكنش حب وهندم ليه، بعدها بسنة عمل عمرو دياب أغنية الملحن بتاعها محمد يحيى أغنية ريحة الحبايب، والاتنين نفس الشكل، وده مش عيب ومطلعتش ساعتها وقلت هتخانق مع محمد يحيي وارفع عليه قضية".

لوم رامي صبري على عمرو مصطفى
وتابع: "ملحن كبير زي عمرو مصطفى مينفعش يطلع يقول على فنان وملحن مش صغير ومطرب مش صغير أنه سارق ويتهمني بالسرقة، عيب يتهمني بالإتهام ده، أنا مكانتي مش صغيرة في الوسط".

مشكلة عمرو مصطفى
وأكمل: "مشكلة عمرو مصطفى مش أغاني، لأن لو حد فينا سرق حاجة منه هيقاضيه وهيعمل كل حاجة بالقانون لأنه خريج كلية حقوق، وأنا خريج معهد موسيقى عربية قسم تأليف موسيقى يعني لما تيجي تتكلم عن متخصص وانت خريج حقوق يبقى لازم تعرف انت بتتكلم عن مين".
وتابع: "أنا لو مركز معاه هاحبسه بالقانون ولكن أنا بكبر دماغي، أنا مش بتاع خناقات ولا دي طريقتي ولا هرد عليه بطريقته وهقوله ربنا يهديك وأنا شايف انك تشتغل اكتر وتعمل حاجات كتير زي ملحنين كبار تانيين زي عزيز الشافعي ومدين مش مركزين في اللى انت بتعمله".
ووجه رامي صبري لعمرو مصطفى نصيحة، قائلا: "ركز في شغلك اكتر واعملنا شغل حلو وانا عن نفسي لو فيه اغنية حلوة ليا هاغنيها، إنما تطلع تقول ده سرق وده خد مني عيب يطلع من فنان كبير زيك".

حق عمرو مصطفى القانوني
وأضاف: "قانونا مش من حق عمرو مصطفى انه يقاضيني ولا يتهمني بالسرقة وانا فعلا مسرقتش منه حاجة، عمرو لما بيغير من نجاح بيطلع يخبط في الناس ومفيش فينا حد عاتبه خالص ودايما يتهمنا بالسرقة ويقول كلنا واقعين طيب ازاي".

رامي صبري: عمرو مصطفى فنان كبير وموهوب
ولفت: "نفسي عمرو مصطفى يركز في شغله لأنه فنان كبير وموهوب ومطربين كبار نجحوا بفضل الحانه زي عمرو دياب ومحمد حماقي، بقوله متعملش عداءات مع الناس ومتقعدش تخبط في الناس حتي لو انت مش في المرحلة دي وانا بجد اتضايقت منه وأنا مش بحب التقليل من قيمة الناس، أنا المفترض موسيقار زي عمر خيرت وياسر عبد الرحمن".

رامي صبري يهدد عمرو مصطفى
وأكد: "أنا لو عندي مشاكل نفسية مكنتش خليتك تغني أو تشتغل تاني بالقانون لأني دارس ومتخصص وهو زي التلميذ بالنسبة لي وأنا الأستاذ وهو خريج حقوق ولكن هعديها علشان مراته ست محترمة وأولاده زي أولادي".

تفاصيل اتهام عمرو مصطفى لرامي صبري بسرقة ألحانه
وكان الفنان عمرو مصطفى، اتهم المطرب رامي صبري، بسرقة لحن أغنيته "رقصة"، قائلًا: "أنا ما ينفعش من شوية أغانيَّ كلها بتتسرق ونزلتها من سنة ولقيته بيقول لي دا أنا عاملها من 2016 طيب أنا عايزك تطلع يا رامي أي حاجة تثبت إنك عاملها في 2016 أو 2009 زي ما قلت في تصريحات تليفيزيونية وأي آلة بتسجل عليها بتوثق التاريخ".

وأضاف خلال الجزء الثاني من لقائه ببرنامج "حبر سري" الذي تقدمه الإعلامية أسما ابراهيم بقناة "القاهرة والناس": "أنا بحب رامي صبري، بس ما ينفعش حد ياخد حقوقي وأبقى حلو معاه مش ممكن، أغنية رقصة نزلت وهو بارك لي عليها".
وتابع: "فيه ملحنين كتير سرقوني غير رامي صبري، وأنا ما بعرفش أسكت، فيه سرقات رهيبة عن الحان كتير ليَّ".

ولفت عمرو مصطفى: "رامي صبري كلمني قال لي معلش علشان خاطري شكلي مش حلو وأنا كنت عامل الأغنية، وعاملها ومش عاملها طيب هات لي اللي يثبت إنك عاملها، أما أنا لو عايز أشيل له الأغنية من على يوتيوب هشيلها له، الأغنية ناجحة علشان أنا اللي عاملها بس أنا سيبتها له بمزاجي بس هو كان زود كنت هوقفها وبكرة الصبح هبلغ اليوتيوب إن دا لحني ونازل على يوتيوب قبله ومفيش حاجة اسمها توارد أفكار دا واخدها بالظبط، وأغنيته بعنوان يمكن خير جايبة 35 مليون مشاهدة وأنا أغنيتي رقصة جابت 4 مليون مشاهدة بس هما الاتنين لحني وجملي اللحنية، وفيه نفس الأغنية خد جملة لحنية أخرى من وائل كافوري وانا بقيت مباح، اقسم بالله ما هسيب حد ياخد جملة لحنية مني تاني".
-----------------------------------------------
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي، الدوري المصري، كأس مصر، دوري القسم الثاني، دوري أبطال أوروبا، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري ل أخبار الفن والعديد من الأنشطة الثقافية والأدبية