حنان مطاوع: خالد يوسف جالي البيت علشان يقنعني بالمشاركة في سره الباتع (فيديو)

قالت الفنانة حنان مطاوع:"رفضت دوري في مسلسل سره الباتع، في البداية من أجل تنظيم الوقت ولارتباطي بأعمال أخرى".

حنان مطاوع تكشف عن رفضها مسلسل سره الباتع في البداية
وأضافت خلال لقائها ببرنامج "مساء دي ام سي" الذي يقدمه الإعلامي رامي رضوان بقناة "دي ام سي":"انبسطت جدا بمسلسل سره الباتع لما خالد يوسف كلمني، لكن قلت له قبل ما تحكيلي أي حاجة المكالمة على راسي من فوق بس أنا بحضر لمسلسل اسمه كفر العميان وهو متعملش فأنا بحضرله ومش هعرف ادخل في عملين، فسامحني فقال لي انتي بكرة فين يا حنان قلت له في البيت، فقاللي بكرة 9 الصبح انتي وجوزك تعزميني على فطار فقلت له تنور انت بتفطر إيه فقال لي فول وطعمية، وجه وفعلا ونورنا في البيت وحكا الحدوتة وطلعت رائعة وحسيت بروح النضال وكل المصريين متيمين بالأرض، واقنعني بالمشاركة في العمل".

تصوير مسلسل سره الباتع
وتابعت حنان مطاوع:"دخلت وصورت دور صافية في مسلسل سره الباتع، والمسلسل بتاعي كفر العميان، فضل يتأجل لحد لما متعملش خالص، وقبل رمضان بشهرين عملت وجوه سخية".

نجاح مسلسل سره الباتع
واستطردت:"نجاح مسلسل سره الباتع، كان فوق خيالي ومكنش في أحلامي انه ينجح كده، هو عمل ضخم ولي الشرف اني من ضمن فريق العمل".
في تصريحات سابقة، قالت الفنانة حنان مطاوع: "أنا من الشخصيات اللى بتفكر كويس قبل ما ترد وبحس اني مبقصدش ألبس قناع ولكن ممكن ألبسه غصب عني في التعامل مع الناس".
حنان مطاوع عن طقوس العيد: بجيب بومب وبفرقع أنا وبنتي (فيديو)
حنان مطاوع تبرز مقال "فيتو" عن الرابحين والخاسرين في دراما رمضان
خوف حنان مطاوع من الأضواء

وأضافت خلال لقائها ببرنامج "أنا والقناع" المذاع علي قناة "الحياة": "أنا شخصية خجولة جدا ومكنتش أتخيل أبدا وإلى الآن أني تسلط على الأضواء، أنا بخاف الأضواء على عكس ماما سهير المرشدي لو داخلين مسرح تحب تقعد في الصف الأول في المكان المتميز أيا كان أنا العكس تمام بحب اقعد ورا علشان اتأمل الأشياء".

تركيبة حنان مطاوع

وتابعت حنان مطاوع: "أنا تركيبة مش شبه ماما سهير المرشدي ولا بابا كرم مطاوع، مش تركيبة النجم أو الباحث عن الأضواء، أنا تركيبة فنانة وبخاف من الأضواء لأنها بتجنن البني آدم وبخاف من انتهاك الخصوصية لأني أؤمن جدا بالخصوصية، مبحبش عالم الأضواء لكن الفن بحبه جدا".

قصة تمرد حنان مطاوع علي والدها كرم مطاوع

وعن قصة تمردها على والدها قالت: "أنا تمردت على شهرة ونجومية أسرتي من بداية لما قعدت ادور في اسم بابا حاجة أبعد بيها كرم عن مطاوع ومبقاش حنان كرم مطاوع فلقيت بابا اسمه كرم مصطفى محمود مطاوع ومكنتش اعرف ده فقلت هما في المدرسية بيبقوا عايزين الاسم ثلاثي أو رباعي فاخترت حنان مصطفى محمود، ومحدش عارف بقى انا بنت مين وده كان اول تمرد ليا، وده اول وقفة بيني وبين بابا".
وأضافت: "أنا مكنتش حابة ابقى فنانة زيهم وعاندت كتير ودرست تجارة انجليزي بمنتهى الرفض اني ادرس فنون مسرحية مع اني بابا كان استاذ دكتور في المعهد وقعد يقولي انتى بتعاندي وماشية ضد التيار ليه هتلفي هتلفي وتبقى في عالم الفن، انا كنت بعاند علشان عايزة استقل ومبقاش في معية الأسرة وعلشان كده كنت عصبية وأنا صغيرة وصوتي عالي ولحد دلوقتي عصبية بس مش على الآخر".
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.