ساويرس: الفلوس مش بتجيب سعادة.. وأنا كنت مغرور وربنا كسرني علشان أفوق (فيديو)

قال رجل الأعمال المهندس نجيب ساويرس: "اللى بيقول الفلوس مش مهمة يبقى بيهرج، أنا واحد من وانا صغير بقولهم عايز أبقى أغنى واحد في العالم".

منطق نجيب ساويرس في جمع الأموال
وتابع خلال لقائه مع الإعلامية نايلة تويني: "أنا مكنتش بابحث عن الفلوس من ناحية الماديات، ولكن كنت شايف ان الفلوس دي ممكن تبقى قوة لعمل الخير، وشفت ان الفلوس الكتير دي ممكن أعمل بيها خير كتير جدا وأقاوم بيها الشر، وكنت واخدها من المنطلق ده".

حياة نجيب ساويرس في الصغر
وأضاف نجيب ساويرس: "الفلوس متجيبش سعادة، ولما مكنتش باخد فلوس من والدي وانزل معايا 5 صاغ أدفع قرش صاغ لل "تروللي باص" اللى هيودينا وسط البلد علشان نروح سينما مترو، والتذكرة بقرشين صاغ علشان ناخد آيس كريم بقرش وقهوة بعد السينما، ونشتري لب وتبقى دي الخروجة بتاعتنا، وكنت ببقى أسعد واحد على وجه الأرض، مكنتش محتاجة فلوس، والفلوس متجيبش سعادة".

السعادة بالنسبة لنجيب ساويرس
وأكمل: "السعادة بالنسبة لي الحب والفرح ولما نشوف حد بنحبه وواحشني، السعادة في الغرام والضحك، السعادة في رؤية الأبناء والأحفاد".

تربية أبناء نجيب ساويرس
ولفت: "انا ربيت أبنائى علي نفس الأسس والطريقة اللي اتربيت عليها وامهم هي اللى بتربي وربيتهم طالعين احسن مني، ومكملين في الحاجات الحلوة بتاعت جدتهم وبيروحوا دور الأيتام وملاجئ الكلاب وبنتي الصغيرة راحت في مخيم في الأردن للاجئين السوريين، وأم عيالي شديدة جدا ومصروفهم كان اقل مصروف في المدرسة وإذا كنت بحاول أبوظهم شوية كانت تقفشهم".

الغرور بالنسبة لنجيب ساويرس
وأشار ساويرس: "أي واحد مغرور أو شايف نفسه مش بحبهم لإنه بينسى أهم حاجة إنه ولا حاجة لو ربنا ما أرادش لك إنك تنجح مكنتش نجحت أساسا، فبدلا من الفرحة بنفسك، وتفرقع لنا مرارتنا أقعد اذكر ربك على اللى انت فيه لإنه هو السبب".
ولفت: "كمية الشر اللي اتعرضت له في حياتي واللى بكل المقاييس مكنش ممكن اقدر انتصر عليه بمقاييس الدنيا؛ القوة والعدد مش ممكن انتصر عليه إلا لو ربنا نصرني، فالغرور عدم إيمان أو عدم تقدير بنعمة الله".
وتابع: "أنا أخدت درس لإني كنت مغرور، وربنا كسرني علشان أفوق من الغرور اللى كنت فيه فبقيت دلوقتي لما أحب أفرح بحاجة حلوة أقول لنفسي: اسكت اسكت ده فضل ربنا".

طبيعة نجيب ساويرس في بيئة العمل
ولفت:"طبعي في الشغل بحب إن الناس تشتغل معايا تحبني واعتبر اللى بيشتغلوا معايا عائلتي، يعني ممكن واحد يشتمني أو يهينني فاقوله ربنا يسامحك بس لو غلط في واحد بيشتغل معايا أمي تكون داعية عليه لإن مينفعش حد يسيء لواحد بيشتغل معايا، لإني ممكن تفور الدنيا واكسر الشركة على دماغ اللى غلط ولا يهمني فلوس ولا مصلحة، وأنا ديمقراطي في الشغل واحب اسمع كل الآراء ولو معرفوش ياخدوا قرار في الآخر باخد قرار ومستناش لإن مفيش ديمقراطية بلا حدود، وبخاف على الناس اللى بتشتغل معايا من كل ناحية واحب ان الناس تحس اننا فريق كرة كلنا بنكمل بعض".

وأكمل: "انا أكره الحسد والحقد وأؤمن إن فيه عين وحشة، ومش بخاف من الموت خالص لإن لا في إيدي أتحكم فيه ولا أؤجله ولا اعرف ميعاده.. أخاف منه ليه، أنا أسامح الشخص اللى غلط لو اعتذر، ولكن قلبي شيال وليوم القيامة مش هنسى له الإساءة، يعني والدي كان ينسى الإساءة، إنما انا افتكر واحد من 20 سنة واستناه ارجع له الاساءة".

نجيب ساويرس: الأرقام المنشورة عن ثروتي خاطئة وبحب مجال البناء والتشييد (فيديو)
نجيب ساويرس: أول مكسب عملته كان من "البلي".. ومش بحب ألمع نفسي (فيديو)
موقف نجيب ساويرس من القضية الفلسطينية
وعن القضية الفلسطينية، قال: "عندي أصدقاء يهود ودايما اقول لهم انتو شعب تعرضتوا للاضطهاد واتبهدلتوا في كل العصور وهتلر حاول يحرقكوا، ربنا أكرمكم وبقى عندكم وطن، ازاي تبنوا سعادتكم على شقاء الاَخرين؟!، ازاي تعملوا كدة في الفلسطينيين، وبالوضع القائم لن تستقيم الأمور ولا الوضع، والتطبيع كله كلام فاضي وطظ في التطبيع طول ما الاسرائيليين رافضين حل الدولتين واقامة دولة فلسطينية، بالشكل ده مش هيحصل سلام، في النهاية لن يصح الا الصحيح".
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.