المصريون يبحثون عن كيلو اللحمة بعد ارتفاع سعرها ونشطاء: خليها تعفن

سعر كيلو اللحمة، تصدر سعر كيلو اللحم تريند مصر على مواقع التواصل الاجتماعي "تويتر، وفيس بوك"، كما تصدر البحث على مؤشر البحث الأكثر شهرة "جوجل"، بعد ارتفاع أسعار اللحوم، مؤخرًا، ليتراوح سعر كيلو اللحم من 240 إلي 280 جنيه.
ارتفاع سعر كيلو اللحمة
أثار سعر كيلو اللحمة ردود أفعال واسعة بين نشطاء مواقع التواصل الاجتماعي، فالبعض طالب بمقاطعتها من خلال حملة "خليها تعفن"، بينما أكد آخرون أن ارتفاع سعر كيلو اللحمة بسبب التاجر الذي لا يقل مكسبه في الذبيحة الواحدة عن 21 ألف جنيه.
علق طارق أبو علوي عن ارتفاع سعر كيلو اللحمة فقال: "كيلو اللحمه بقي ب 250 جنيه يعني دلوقتي هتروح للجزار هتقوله اديني حته ب 50."
بينما قدم صابر حسن اقتراحا للقضاء على ارتفاع سعر كيلو اللحمة فقال: "وجهة نظر خارج الصندوق طالما كيلو اللحمة عدى ال250 جنيه ولسه منعرفش سعرها حيوصل كام فى رمضان طب ليه الأهالي ما يتشاركوش في عِجل مثل الأضحية فى موسم الحج ويقسموه بينهم؟ وعلى فكرة بالورقة والقلم الكيلو هيساوى 150 جنيه بس"
فكرة برة الصندوق لخفض سعر اللحوم
ورد محمد حامد على الاقتراح قائلًا: "أولا فكرة حلوةلكن حسابيا غلط طبعا. بناء علي إيه حسبت العجل 25000ج يطلع ل 10 أشخاص 25ك غير الكبدة ولحمه الراس وغير لا مش بتتحسب كده العجل دلوقتي تمنه حوالي 45000ج لان سعر القايم 108 ×400ك=43200 هايطلع صافي 150 ك علي 10 أشخاص 15 كيلو وهو دافع 4320 يبقي الكيلو واصل 288ج خلي بالك انا محسبتش الدبح ولا المشال فالموضوع مش هايظبط كده خالص مع إحترامي فملوش أي لازمه التعب الشراء والدبح والتوزيع نجيب أحسن من الجزارين صدقني أوفر"
ارتفاع اسعار اللحوم، فيتو
بينما قدم سامي عمار اقتراحا لخفض سعر كيلو اللحمة فقال: "خليها تعفن قاطع مش هتموت من قلة اكلها يعني قاطع وخلي الجزار يفضل دابح وقاعد جمب الدبيحة بتعته لمده 30 يوم كيلو اللحمة يتراوح من 250جنيه الي 280 وهتوصل الي 300 جنيه الفكرة مش ف إنك مش فارقة معاك 20 ولا 30 ولا 40 زيادة الفكرة ف إنك بتشجعهم يحرموا الغلبان ياكلها"
وقالت نيرمين: "المشكله إنها بتغلا وجودتها بتقل بقت بتاخد سوا كتير على النار وتيجي تاكلها تلاقيها بتشد زي مايكون بيأكلوها طوب... #كيلو_اللحمه"
أما الطيب فعلق قائلًا: "كيلو اللحمه يوصل 250مع ثبات المرتبات عند الحد اللآدمي يعي 95٪من المصريين محرومين من الغذاء الصحي..."
قطعة اللحمة ب45 جنيه
في حين قال محمد يوسف "بالمناسبة كنت في هايبر ماركت... في شارع 45 عندي في اسكندرية وده كان سعر اللحمة البلدي 299 جنيه!!..."
ورد محمد فاروق فقال: "تخيلوا كيلو اللحمة وصل 260جنيه بالكثير يتقسم 6 قطع يعني اسرة مكونة من ستة أفراد كل واحد قطعة ب45جنيه"
اسعار كيلو اللحمة يتصدر التريند، فيتو
وعلقت أم سيف قائلة: "كيلو اللحمه ب 260 جنيه وكيلو الفراخ ب 90 جنيه وكيلو البانيه ب 200 جنيه.. خليها تعفن"
أما عكشة فقال: "كيلو اللحمه ب 250 جنيه يعني تدخل علي الجزار بقلب وضمير مرتاح تقوله ينفع أقسط؟!"
وعلق مجدي أبو المجد قائلًا: "كيلو اللحمة ب 250 جنيه فلما تسمع حد بيقول لصاحبه جبت حتة ب 50 اوعى تفتكره مدمن ممكن تكون لحمة عادي"
أما ريمون رأفت فقال: "جشع من التجار كيلو اللحمه فى البلد 200 جنيه. فى ملوى المنيا وفى مدينه 6 أكتوبر عندنا ب 260"
وعلق مجدي شعبان قائلًا: "كيلو اللحمة النهاردة 280 جم مين هيقاطع؟!"
سر ارتفاع سعر كيلو اللحمة
ورد عصام ابو فارس "كيلو اللحمة قايم ب 110جنيه السنة دي الضحية حتبقي لمن استطاع اليه سبيلا"
أما بهاء أبو إسلام فحكى قائلًا: "اشتريت نصف كيلو لحمه ودخلنا نشتري نصف كيلو ارز راحت المدام اخدت كيس اللحمة في إيدها، فقلت لها خليه في العربية فقالت لي لاحسن حد يكون متتبعنا بعد ما طلعنا من عند الجزار ويكسر زجاج العربية وياخده فقلت لها هو احنا كنا طالعين من البنك، اه يا زمن"
وفسر مصطفى ناجي سر ارتفاع سعر كيلو اللحمة فقال: "ليه اللحمة ب 240 جنيه السادة الجزارين كلمتين لوجه الله تعالى حضرتك بتجيب الدبيحة من السوق وهنفترض أن وزنها 500 كيلو وعاملة في السوق 35 أو 40 ألف جنيه وبعد الدبح هتعمل معاك لحم مشفي350 كيلو. نحسبها عشان الناس الغلابة واحنا كمان نفهم وياريت تحترمو عقلنا شويه هنحسب على سعر الكيلو 170 جنيه وليس 190 و200 جنيه و240 اللحم المشفي350 ك×170ثمن البيع =59,500 ألف جنيه، وعند حضرتك عفشه كرشة وكبده وجلد وعظم الخ هتعمل كمان 2000جنيه تقريبًا يبقي الإجمالي 61,500، نطرح 500 نقل عربية من السوق يبقي المتبقي مع حضرتك 61,000 ألف نطرح 40,000 ثمن الدبيحة يبقي المتبقي وصافي الربح 21,000 ألف ربنا يباركلك في رزقك ويزيدك بالحلال
وتابع مصطفى ناجي قائلًا: "عايز تكسب أكسب بس مش على حساب الغلابة وربنا بيبارك في القليل أرجو محدش يزعل ورأفه بنا فيه ناس عايشه اليوم بيومه كان الله في عون العبد ما دام العبد في عون اخيه وحسبنا الله ونعم الوكيل في كل تاجر يرفع السعر بدون وجه حق... حبيت احسب حسبه بسيطه على قد فهمى"
رئيس زراعة البرلمان: هذه أسباب ارتفاع أسعار اللحوم وسبل حل الأزمة
خبير يكشف الأسباب الحقيقية لارتفاع أسعار اللحوم، ويضع 8 حلول لتجاوز الأزمة
ونقدم لكم من خلال موقع (فيتو) ، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.