سهير رمزي تكشف عن أزمتها بسبب فيلم المذنبون (فيديو)

قالت الفنانة سهير رمزي: "مش بحب فيلم المذنبون، رغم إنه قصة نجيب محفوظ وإخراج سعيد مرزوق وشارك به العديد من النجوم، والعمل كان يناقش قضايا مهمة في مصر".

نجاح فيلم المذنبون
وتابعت خلال الجزء الثاني من لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس":"فيلم المذنبون كسر الدنيا ولم يتم منعه من العرض".
اقتناع سهير رمزي بفيلم المذنبون
وأضافت: "ما كنتش محتاجة حد يقنعني بالمشاركة في فيلم المذنبون وعملته وأنا فرحانة جدًّا ومقتنعة به لأني كنت لسه في بداية حياتي الفنية، وهو من علامات السينما المصرية ولكن أنا كنت جريئة في بعض المشاهد".
تسبب فيلم المذنبون في طلاق سهير رمزي
وأكدت: "فيلم المذنبون كان سبب في طلاقي، وأنا عندية جدًّا وقتها قال لي لو عملتي الفيلم ده هننفصل وقد كان وانفصلت وبعد الانفصال رجعنا تاني".

ندم سهير رمزي على عدم الإنجاب
وقالت الفنانة سهير رمزي: "ندمت على عدم الإنجاب رغم إني اتجوزت أكتر من مرة، ودلوقتِ لما كبرت في السن زعلانة إني ما جبتش حد يبقى جنبي".

حزن سهير رمزي على عدم الإنجاب
وتابعت خلال الجزء الثاني من لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "زعلانة إني ما جِبتش الإنسان اللي يقف في جنبي لما أكبر في السن وجيلنا كلنا كنا خايفين نخلف عيال علشان النجومية وجسمنا يبوظ".

تفكير سهير رمزي حال أنجبت طفلًا
وأضافت: "لو كنت أنجبت طفل وأنا بشتغل ما كنتش هخرج برا البيت ولا هشوف حد في حياتي وهو هيبقى كل حاجة في حياتي، فكانت أنانية مني إني حبيت سهير رمزي أكتر من إنها يكون لها طفل في حياتها".

تبني سهير رمزي الأطفال
ولفتت: "فكرت أتبنى طفل يتيم بس مش يعيش معايا علشان المسؤولية ولكن أتبناه من بعيد".

خطأ سهير رمزي مع والدتها
وفجرت الفنانة سهير رمزي مفاجأة حول أنها كادت تتسبب في إصابة والدتها بالتسمم عن طريق الخطأ، بعدما أعطتها مادة كيماوية بدلًا من الدواء.

وأضافت سهير رمزي: "كنت هسمم أمي بالغلط وكانت حكاية غريبة، أنا كنت بحب أمي بجنون ومن وقت وفاتها قبل 20 سنة لحد اللحظة اللي أنا فيها بحس إني ضايعة من غيرها وهي كانت بالنسبة لي كل حاجة في حياتي".

مرض والدة سهير رمزي
وأضافت خلال لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "أمي جت تعبت في يوم وقالت لي تعبانة وعندي مغص فأنا كان عندي دواء الدكتور كان كاتبه لي يريح المعدة ودخلت جري وأخدت إزازة من الحمام وحطيت لها معلقة فشربت معلقة من زجاجة منظفات بها مادة سامة محطوطة جنب زجاجة الدواء اللي المفترض كنت أديلها منها".

إنقاذ سهير رمزي والدتها من المادة السامة
وتابعت: "لما عرفت إني اديت لها المادة السامة ندهت للناس اللي كانوا بيساعدوني في البيت وقلت لهم انزلوا للصيدلية اللي تحت وعرفوا الصيدلي اللي حصل فجابوا لي شربة ملح لازم تشربها علشان تخف ونزيل آثار المادة السامة".

موقف صعب لسهير رمزي مع والدتها
وأكملت سهير رمزي: "دخلت أعطي لأمي شربة الملح قالت لي ده مريحني جدًّا المهم قلت لها لازم تاخدي ده، وبعدين اديتهولها في الآخر وشربته ورجعت فقالت لي كنتِ هتموتيني بالسم، وكان يوم مش ممكن وبقيت أقول يا نهار أسود لو كان جرى لها حاجة كنت هروح فيها".

حياة سهير رمزي بعد وفاة والدتها
وتابعت: "أنا مفتقدة الفرحة والضحكة وطعم الأكل والحياة واللبس والقعدة الحلوة بعد وفاة أمي".

سبب رفض سهير رمزي استلام ميراث والدها
وعن سبب رفضها تسلم ميراث والدها، أوضحت سهير رمزي:"أنا بحب آخد الحاجة اللي من حقي شرع ربنا بس أنا وقتها ما كنتش محتاجة وما كنتش عايشة معاه خالص ولا أعرفه ولا يعرفني ولا شفته خالص، إخواتي أحق بالميراث ولما اتنازلت اتنازلت لإخواتي علشان هو اللى مربيهم وقاعدين معاه، واتنازلت لأصغر أخت ليَّ كمساعدة ليها في تجهيزها الخاص بالزاوج، أنا شوفت أبويا مرة واحدة وأنا عندي 13سنة وقتها حضنني وباسني بس اللي كان مربيني المخرج سيد زيادة وكنت بحس إنه قرب لي من أبويا والعشرة والتربية مهمة جدًّا، ولكن ريحة الصوف بتاعت أبويا لسه لحد دلوقتِ في مناخيري".

سهير رمزي تكشف عن أسباب عدم الإنجاب رغم الزواج أكثر من مرة (فيديو)
لو رجع الزمن لورا هتقدمي نفس المشاهد الجريئة؟ سهير رمزي ترد (فيديو)
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.