سماح أنور: أنا غير صالحة للعلاقات العاطفية.. ووقعت في الحب مرة واحدة

قالت الفنانة سماح أنور: "أنا مش مسترجلة ولا حاجة هما اللي بيقولوا كده، واللي بيقول عليَّ مسترجلة بفرح أوي لأني هو أكيد شافني عملت الدور كويس وأقنعته به".

سر ارتداء سماح أنور البنطلونات
وتابعت خلال لقائه ببرنامج "كلام الناس" المذاع على قناة "إم بي سي مصر": "اخترت أدواري باختياري دون أن يجبرني أحد عليها، وأنا بلبس بنطلونات علشان برتاح فيها ومش دا اللي يخليني مسترجلة".

حياة سماح أنور الشخصية
ولفتت: "مش برد على الشائعات اللي بتتناول حياتي الشخصية وفي عصرنا الحالي مهارة التفكير معدومة تقريبًا".

تجربة الحب والزواج مع سماح أنور
وأشارت: "أنا من الناس اللي بقع في الحب لكن ما بقعدش أقول عايزة اتجوز، ما حبتش إلا مرة واحدة في حياتي ومكنتش لطيفة وبالنسبة لي ما بشجعش تجربة الحب، وأي ست لما بتحب بتقع على أسنانها والموضوع ده بيطفش الرجالة، وأنا ما بعرفش أتقل في الحب وببقى قاعدة بتعذب لإني ببص علي التليفون وعايزاه يرن عليَّ ويكون معايا على طول وعلشان كده أنا مش صالحة للعلاقة العاطفية، وأنا دلوقتِ في سن مش بتاع حب وغير صالحة للعلاقات العاطفية ومنفعش في الحب، وحياتي بقت مقفولة على نفسي أنا وشغلي وابني، وأنا مش عايزة راجل في حياتي".

أعمال سماح أنور الفنية
قالت الفنانة سماح أنور: "قدمت خلال مسيرتي ما يقرب من 200 عمل فني، وفي الحقيقة لا أحب مشاهدة أعمالي، وعمرى ما اتفرجت على نفسي وانبسطت ودايمًا بطلع القطط الفطسانة في شغلي علشان بحب الحاجة تطلع حلوة".

وأكدت خلال تصريحات خاصة ل "فيتو": "لم أندم على أي عمل شاركت فيه حتى لو لم يكن ناجحًا، ولكني لست راضية عن الكثير من التجارب الفنية، ومشواري الفني كله لم يعبر عني، ولم أقدم الشخصية التي تعبر عن حياتي أو وجهات نظرى علي الإطلاق.

أفلام الأكشن
وأوضحت: "دخلت في باكورة الأفلام الأكشن بعد نجاح فيلم "حالة تلبس"، ومشاركتي في الأكشن لم يكن رغبة مني ولم يكن الأمر بيدي، حيث كان أمامي خيارين إما الاشتراك في تلك النوعية من الأفلام وإما الجلوس في البيت".