افسخي خطبتك فوراً وليكن ما يكون

السلام عليكم، أنا مخطوبة لابن خالتي من 7 شهور، حاولت كتير إني أحبه مش عارفة، أنا مش متصوّرة إنه يكون جوزي، أنا باعتبره أخويا لأننا متربيين سوا، أنا كلّمت أهلي؛ لكن مش موافقين إني أفسخ الخطوبة، وأنا خايفة أصرّ على رأيي وأعمل مشكلة لأن والدتي تعبانة، ومش هتستحمل؛ بس بجد صدقوني أنا مش عايزاه، وحاسة إنه كمان مش بيحبني وإنه خطبني علشان القرابة وكده.
وهو فيه طباع وحشة: بيحب النمّ أوي، وأنا باكره الإنسان اللي كده، ومش بيكلمني ولا بيقرّب مني، ويفضل بالشهر ما اعرفش عنه حاجة.
أنا بجد تعبانة ومش قادرة أعمل حاجة ولا أذاكر أنا امتحاني آخر الشهر، ومش قادرة أذاكر، كمان أنا عندي طموحات أنا في دبلوم فني وأمنية حياتي أكمّل دراسة الهندسة، وهو مش دماغي؛ هو عايز واحدة تفضل تربي العيال.
بجد أنا حاسة إني متحطمة، أنا دخلت الدبلوم غصب عني واتخطبت غصب عني، وكمان مش هاكمّل كلية ودي أمنية حياتي، مرعوبة إني أتجوز وكمان غصب عني واحد مش بحبه. قولوا أعمل إيه أنا بجد متدمرة.
lina


لو عايز تفضفض لنا دوووس هنا