البنات عايزه إيه بالظبط

أنا نفسى أعرف هما البنات عاوزين إيه بالظبط.. أنا بقالى 30 سنة مصنفة تحت النوع ده (أنثى يعنى) ومررت بكل تنويعاته.. بنت وأخت وزوجة وحاليا أم ولغاية دلوقتى مش عارفة ولا قادرة أفهم نفسى.
يعنى وأنا بنوتة صغيرة خالص كان نفسى جدا أعيش طفولة مسترجلة، أركب عجل وأنزل ألعب فى الشارع ماتشات كورة، وانضممت وأنا عندى تسع سنين لفريق كرة اليد فى النادى لغاية ما بقى كف إيدى قد كده، وماكنش ليا أصلا أصحاب بنات، كل اصحابى كانوا أولاداً وكان دايما أبويا يقوللى يا بنتى أنا مش فاهم إنتى إيه مشكلتك بالظبط.
خلانى قعدت ركزت سنين علشان أدور أنا إيه مشكلتى بالظبط وفى الآخر، لما قربت على 16 سنة، اكتشفت إن أنا مشكلتى إنى بحب الحرية والانطلاق، وطبعا لكونى بنتاً فأمى كانت ديما بتقولى عيب تنزلى الشارع.. عيب تخرجى.. عيب تركبى عجل.. بلاش بنطلون.. ماتقصيش شعرك تانى كده.. وبلاش الحظاظة اللى ف رقبتك دي.. موتوسيكل ايه اللى عاوزه تروحى بيه الجامعة إنتى عاوزه تعنسى، أسألها ببراءة «يا ست الكل أركب موتوسيكل أحسن ولا اتزنق وسط الرجالة ف الأتوبيس؟!» لكن إجابتها دائما كانت بتقول لى «إنتى بنت»، فاكتشفت أن الحل الوحيد إنى أبقى ولد علشان، كان كل طموحى هو قدر من الحرية فى اختيار تصرفاتى ولبسى وأسلوب حياتى.
بين سنوات عمرى ال 18 وال 22 اكتشفت أنى كنت غلطانة طيب ما أنا ممكن أبقى حرة وفى نفس الوقت آنسة حلوة جميلة شيك من الآخر «مزة»، فبدأت أطور وأغير حياتى عشان تناسب اتجاهى الجديد وهو طبعا اتجاه قوى ناحية فكرة البحث عن الرجل، والبيت والعيال وأمشى أزق عربية النونو.
وفعلا نجحت ف ده لغاية ما اتجوزت.
وبعد كده اتغير اتجاهى بقيت عاوزة أرجع بيت أهلى تانى؟! شيزوفرينيا بقى.
أصل شغل البيت تعبنى، ولقيت إنه صعب على إنى أراعى حد تاني، قعدت أزن ع جوزى علشان أشتغل أن القعاد ف البيت خنقنى، ولما اشتغلت بقيت مش قادرة أكتر.. شغل وطفل وطبيخ وغسيل إيه ده أنا لو عبد أجير مش هايتعمل فيا كده.
أنا عاوزه أسيب الشغل وأتفرغ للأعمال الخيرية، أصلى حاسة إنى هانجح أوى فيها وأن هى ملاذى الأخير.. هتقول على مجنونة.. عادى بقى ما كلهن كذلك.
مروة حجازى