بعد حبسه 6 سنوات.. النص الكامل للتحقيقات في واقعة مدرس حدائق الأهرام

قضت محكمة جنايات الجيزة، اليوم السبت، بالحبس 6 سنوات للمدرس المتهم بهتك عرض طالبة في منطقة حدائق الأهرام.

وكانت النيابة العامة أحالت المدرس المتهم بهتك عرض طالبة بالقوة إلى المحاكمة الجنائية.

وقال أمر الإحالة: إن المتهم بهتك عرض الطالبة، التي لم تبلغ من العمر ثمانية عشر عامًا، وكان ذلك بالقوة حال كونه من المتولين ملاحظتها وله سلطة عليها بأن استغل انفراده بها حال تلقينها مادة دراسية في مسكنها، وباغتها بأن استطالت يده إلى أماكن من جسدها (يدها - ساقها) فأخل ذلك بحيائها إخلالًا جسيمًا على النحو المبين بالتحقيقات.

أقوال المدرس المتهم
وحصلت فيتو على نص أقوال المتهم (خ.م):
س: ما تفصيلات ما حدث وما هي ظروف ضبطك وعرضك علينا اليوم؟
ج: هو اللي حصل اني بشتغل مدرس علوم إنجليزي والست اللي اسمها (م.ر) وهي صديقة عندي على الفيس وأنا شوفت استوري كانت هي منزلاها هي وبنتها وأنا دخلت كلمتها وسألت على بنتها عادي وقولتلها أخبارها إيه في العلوم قالتلي أن هي محتاجة مدرس ليها ييجي البيت وأنا وافقت واتفقت على أن الدرس بمبلغ 150 جنيه ورحت أول مرة درستلها لمدة ساعتين وبعدها هما كلموني تلات أو أربع مرات وقالولي تعالي انت مجتش ليه وروحت يوم الخميس (28/ 4) الساعة 10:30 بليل البيت في حدائق الاهرام وقعدنا شغالين لحد الساعة 12 ونص بليل، وفجأة لقيت البنت (س) جريت علي الاوضه وقفلوا الباب علي نفسهم وانا فضلت قاعد عادي وبعد كدة لقيت الست اللي اسمها (م) جايا بتزعق وبتقول الحق عليا اني دخلتك البيت وقالتلي ازاي تحط ايدك علي ايدها قولتلها محصلش وراحت هي نادت علي البواب بتاع العماره والبوابين جم مسكوني وبعد كده لقيتها بتصورني ونزلت الفيديو علي الفيس والضباط جم علي البيت وخدوني وبعد كده عملوا محضر صلح وبعدها مشيت روحت ويوم (30/ 4) لقيت في ضباط جولي البيت وخدوني علي قسم المنيرة الغربية وبعدها ودوني علي قسم حدائق الاهرام وبعد كده ودوني علي قسم الهرم وجابوني هنا علي النيابة وهو ده كل اللي حصل.
س: متى وأين حدث ذلك؟
ج: أنا اتمسكت النهارده الساعة 12 ونص بليل وأنا في البيت في إمبابة، وآخر مرة كنت عندهم كان أول امبارح (28 /4) الساعة 10 ونص في حدائق الأهرام.
س: ما سبب ومناسبة تواجدك في المكان والزمان سالفي الذكر؟
ج: الست اللي اسمها (م.ر) وهي صديقة عندي على الفيس وأنا شوفت استوري كانت هي منزلاها هي وبنتها وأنا دخلت كلمتها وسألت علي بنتها عادي وقولتلها أخبارها ايه في العلوم قالتلي أن هي محتاجة مدرس ليها ييجي البيت وانا وافقت واتفقت علي أن الدرس بمبلغ 150 جنيه ورحت أول مرة درستلها لمدة ساعتين وبعدها هما كلموني تلات أو أربع مرات وقالولي تعالي انت مجتش ليه وروحت يوم الخميس (28 /4) الساعة 10:30 بليل البيت في حدائق الأهرام وقعدنا شغالين لحد الساعة 12 ونص بليل.
س: وما الذي استرعى انتباهك آنذاك؟
ج: فجأة لقيت البنت (س) جريت على الأوضة وقفلوا على نفسهم الباب وأنا فضلت قاعد عادي وبعد كده لقيت الست (م) جايا بتزعق وبتقول الحق عليا اني دخلتك البيت وقالتلي ازاي تحط ايدك على ايدها قولتلها محصلش وراحت هي نادت على البواب بتاع العمارة والبوابين جم مسكوني وبعد كده لقيتها بتصورني ونزلت الفيديو على الفيس والضباط جم على البيت وخدوني.
س: وما هو سبب قيام المجني عليها بذلك؟
ج: معرفش.
س: ما قولك فيما شهدنا به كل من ( س.م - وم.ر) بتحقيقات النيابة العامة من قيامك بالإخلال بحياء المجني عليها الأولى إخلالا جسيما بأن قمت بإمساكها من موضع عورتها؟
ج: الكلام ده محصلش.
س: ما تعليقك إذا لما شهدنا به سالفي الذكر؟
ج: معرفش.
س:ما علاقتك بسالفي الذكر وهل من سابق معرفة أو خلافات؟
ج: مليش أي علاقة أو خلافات بينهم.
س: ما كيفية ضبطك؟
ج: هي الست اللي اسمها (م.ر) نادت علي البواب بتاع العماره والبوابين جم مسكوني وبعد كده لقيتها بتصورني ونزلت الفيديو علي الفيس والضباط جم علي البيت وخدوني وبعد كده عملوا محضر صلح وبعدها مشيت روحت والنهارده (30/4) لقيت في ضباط جولي البيت وخدوني علي قسم المنيرة الغربية وبعدها ودوني علي قسم حدائق الاهرام وبعد كدة ودوني علي قسم الهرم وجابوني هنا علي النيابة.
س: ومن هو شخص القائم بإلقاء القبض عليك؟
ج: هما البوابين اللي مسكوني في الاول وبعد كدة الشرطة جت أخدتني وبعدها روحت.. ولقيت ضباط من قسم المنيرة جم خدوني من البيت وودوني علي الهرم وانا معرفش حد فيهم.
س: وما هو سبب ضبطهم لك؟
ج: معرفش.
س: وما هو مدى قيام سالف الذكر بتفتيشك؟
ج: هما فتشوني ملقوش معايا حاجه.
س: هل تم ضبطك في ثمة قضايا مماثلة من قبل؟
ج: لا.
س: أنت متهم بهتك عرض الطفلة المجني عليها/ س، والتي لم يبلغ سنها ال 18 عاما، بغير قوة أو تهديد بأن أمسكتها من موضع عورتها "يدها وساقها" مما أخل بحيائها إخلالا جسيما وكان ذلك حال كونك بالغا ومن المنزلين ملاحظتها علي النحو المبين بالأوراق؟
ج: محصلش.
س: هل لديك أقوال أخرى؟
ج: لا.

أقوال الطالبة المجني عليها
وحصلت فيتو علي نص أقوال المجني عليها الطالبة (س.م) 15 سنة في الواقعة وجاءت أقوالها كالتالي:
س: ما تفصيلات ما حدث؟
ج: هو اللي حصل أن الأستاذ (خ.م) كان عندنا في البيت بيديني درس علوم وهو كان قاعد معايا في الصالة علي ترابيزة السفرة، وهو كان بيشرح وانا كنت حاطه ايدي علي الترابيزة وهو حط إيده اليمين علي ايدي وانا ساعتها خربشته وكنت مرعوبه وبعدها علطول حط إيده اليمين علي رجلي الشمال وانا ساعتها قولتله بعد اذنك وروحت قولت لماما عن اللي حصل وحكيت لماما وقولتلها تعالي شوفي وهي صورته لايف بالموبايل وبعدها بحوالي ساعتين جه الضباط ومسكوه وراحو القسم وهو ده كل اللي حصل.
س: متي وأين حدث ذلك ؟
ج: يوم (28 /4) حوالي الساعة 11 بليل عندي في البيت في حدائق الاهرام.
س: وما هو صلتك بالمتهم (خ.م)؟
ج: هو مدرس علوم وبيديني درس علوم بقالة اسبوع.
س: وما هي الأفعال المادية التي أتاها المتهم تحديدا؟
ج: هو اتحرش بيا.
س: وما هي الملابس التي كنتي ترتديها آنذاك؟
ج: انا كنت لابسة جاكيت وبنطلون رمادي.
س: وبأي مواضع أمسك المتهم بمواطن عورتك؟
ج: هو مسكني من ايدي ورجلي.
س: وما هي طريقة جلوسك والمتهم؟
ج: احنا كنا قاعدين علي ترابيزة السفرة وهو كان قاعد علي رأس الترابيزة وانا كنت جمبه وهو كان علي شمالي.
س: وكيف إذا أخل بحيائك؟
ج: هو حسس بايده بطريقة قليلة الادب علي ايدي كان هيقرب علي جسمي وحسس علي رجلي.
س: وهل استطالة يده لموطن عفتك؟
ج: لا.
س: وما هو مدى شروعه في ذلك؟
ج: هو حسس بايده علي ايدي وأيدي ساعتها كانت قريبة من جزء حساس في جسدي.
س: وما هو مدي كشف المتهم عن عورتك أو ملابسك؟
ج: هو حسس بايده بس.
س: ألم تقاومي المتهم آنذاك؟
ج: انا ساعتها قولتله بعد اذنك وقمت رميت ازازه الميه في وشه وروحت قولت لماما عن اللي حصل وحكيت لماما قولتلها تعالي شوفي.
س: وما هو مدي احباط المتهم مقاومتك أو رد الاعتداء الذي قمتي به؟
ج: هو معلمش اي حاجه هو فضل قاعد مكانه.
س: وما هو قصد المتهم من ذلك ؟
ج: هو قصده يتحرش بيا.
س: وهل من قوة أو تهديد وقع من المتهم عليكي آنذاك؟
ج: لا.
س: هل لديك أقوال أخرى؟
ج: لا.

أقوال والدة المجني عليها
وحصلت فيتو على نص أقوال والدة المجني عليها (م.ر) وجاءت أقوالها كالتالي:

س: ما تفصيلات ما حدث؟
ج: هو اللي حصل إن في مدرس جه لسلمي بنتي البيت وبيديها علوم وخدت حصة من أسبوع والحصة التانيه كانت يوم (28 /4) والمدرس اسمه (خ.م) وكان بيدي الدرس في الصالة عندي في البيت وانا فتحتله الصاله وعملته نسكافيه وكيكه وسبتهم وبعدها بشوية بحوالي نص ساعه لقيت بنتي (س) بتقولي ماما تعالي شوفي المدرس اللي بره وأول لما خرجت بره وشوفته قالتلي إن المدرس لمس رجلها وانا ساعتها انهارت واتجننت ونديت حارس العمارة بسرعة وحارس العماره جه ومسكه وهو ساعتها حاول يهرب وأنا ساعتها طلعت الموبايل وصورت لايف عشان استنجد بالناس اللي عندي على الحساب وبعدها بحوالي ساعتين جه ضباط البيت خدوا المدرس وروحنا معاهم على القسم وساعتها باباها ضغط عليا وقالي اتصالحي وقولت كده فعلا في المحضر ولما رجعت علي البيت قولت انا مصممه اني اخد حق بنتي وجيت هنا على النيابه وهو ده كل اللي حصل.
س: متي وأين حدث ذلك؟
ج: يوم (28 /4) حوالي الساعة 11 بليل عندي في البيت بحدائق الأهرام.
س: وما صلتك بالمجني عليها (س)؟
ج: هي بنتي.
س: وكم عمرها؟
ج: 15 سنة.
س: وأين تقيم بصورة معتادة؟
ج: هي مقيمة عندي في البيت علطول.
س: وما هي صلتك بالمتهم (خ.م)؟
ج: هو اتواصل معايا علي الماسنجر ولقيته باعتلي رسالة علي الخاص أن اخبارها اي بنتي في العلوم وانا ساعتها اتواصلت معاه وقولتله اني محتاجه مدرس لبنتي واتفقنا علي أن الحصه بمبلغ 150 جنيه وفعلا هو جه في نفس اليوم.
س: ومتي بدأت علاقتك بسالفي الذكر؟
ج: من حوالي أسبوع.
س: وكيف توصل سالف الذكر لحسابك الالكتروني؟
ج: هو دخل علي الاستوري عندي علي الفيس وشاف الصورة بتاعتنا انا وبنتي وساعتها دخل كلمني.
س: وهل كان هناك ربط بين الحساب الخاص بك وحساب المتهم آنذاك؟
ج: هو مش صديق عندي علي الفيس بس هو شاف الاستوري بتاعتي انا وبنتي.
س: وكم عدد المرات التي لقن فيها المتهم المجني عليها دروسا؟
ج: هو أداها درس مرتين اول مره كانت من اسبوع والمره التانيه هي اللي كانت يوم الواقعة.
س: ومن كان بالمسكن وقت حدوث الواقعة خلافا لكي والمجني عليها؟
ج: لا انا وبنتي بس اللي كنا في البيت.
س: وأين هو والد المجني عليها؟
ج: احنا منفصلين عن بعض وهو مقيم في بيت تاني.
س: وما هي الأفعال المادية التي أتاها المتهم تحديدا؟
ج: هو اتحرش ببنتي (س).
س: وبأي مواضع أمسك المتهم موضع عورة المجني عليها؟
ج: هو مسكها من ايديها ورجليها.
س: وما هي طريقة إمساكه وكيف استطالت يده لذلك الموضعين من جسدها؟
ج: كان بيحسس علي ايديها ورجليها.
س: وكيف إذا أخل بحيائها؟
ج: هو حسس عليها علي ايديها ورجليها، وكان بيحسس علي ايديها وكان ساعتها رايح يحط أيده علي جزء حساس من جسدها.
س: وهل استطالت يده ذلك الموضع من جسدها ؟
ج: لا.
س: وهل شرع في ذلك؟
ج: هو حسس بايديه علي ايديها
س: وكيف وقفتي علي ذلك؟
ج: عشان بنتي كانت بعيده عنده وهو حط ايديه علي ايدها واتجاه ايدين رايح لجزء حساس من جسمها ورجلها.
س: ألم تقاوم المجني عليها المتهم آنذاك؟
ج: هو فعلا بنتي قامت علطول وجتلي الاوضه عشان تستغيث بيا.
س: وما هو مدى إحباط المتهم مقاومة المجني عليها؟
ج: لا هو ساعتها مكنش ليه اي رد فعل ولما واجهته قالي انتي تصدقي اني ممكن اعمل حاجه زي كده.
س: وهل من قوة أو تهديد وقع علي المجني عليها آنذاك؟
ج: لا.
س: وما هو قصد المتهم من ذلك؟
ج: هو قصده يتحرش ببنتي.
س: وما هو مدي بلوغه ذلك القصد؟
ج: هو فعلا مسك بنتي واتحرش بيها وحسس بايديه علي ايديها ورجليها.
س: وكيف ضبط المتهم؟
ج: نديت حارس العمارة بسرعة وحارس العماره جه ومسكه وهو ساعتها حاول يهرب وانا وقتها طلعت الموبايل وصورت لايف عشان استنجد بالناس اللي عندي علي الحساب وبعدها بحوالي ساعتين جه ضباط البيت وخدو المدرس وروحنا معاهم القسم.
س: ولماذا قمتي بتصوير المتهم؟
ج: علشان استنجد بالناس اللي عندي علي الحساب.
س: ولماذا لم تقومي بإبلاغ الشرطة؟
ج: هو حد من الناس اللي اتلموا هو اللي بلغ الشرطة بس مش فاكرة مين وانا حاولت كذا مره بس محدش رد.
س: هل لديك أقوال آخري؟
ج: لا.
حبس المدرس المتهم بهتك عرض طالبة حدائق الأهرام 6 سنوات
27 أغسطس.. أولي جلسات محاكمة المدرس المتهم بهتك عرض طالبة حدائق الأهرام
بيان وزارة الداخلية
وكانت أجهزة وزارة الداخلية كشفت ملابسات تداول مقطع فيديو على "فيس بوك" تضمن تضرر إحدى السيدات من قيام أحد الأشخاص بالتحرش بابنتها أثناء إعطائها درسًا خصوصيًّا بمنزلها وضبط طرفي الواقعة.
ورصدت المتابعة الأمنية تداول مقطع فيديو على موقع التواصل الاجتماعي "فيس بوك" تضمن تضرر إحدى السيدات من قيام أحد الأشخاص بالتحرش بكريمتها أثناء قيام قيامه بإعطائها درسًا خصوصيًّا بمنزلها.
وبالفحص تبين أنه بتاريخ 29 أبريل تلقى قسم شرطة الأهرام بمديرية أمن الجيزة بلاغًا من أحد الأشخاص وابنته طرف أول - (كيميائي "يقوم بتدريس مادة العلوم") طرف ثاني – بحدوث مشادة كلامية بين الطرفين وتم التراضي والصلح فيما بينهم وتم تحرير محضر بالواقعة، دون ذكر واقعة التحرش.
وفي وقت لاحق وعقب بث مقطع الفيديو تم تقنين الإجراءات وضبط المشكو في حقه ووالدة الفتاة "القائمة على بث مقطع الفيديو" وتولت النيابة العامة التحقيق.