سمير صبري يكشف سبب اعتذار أحمد زويل له | فيديو

كشف الفنان الراحل سمير صبري، في حديث لم ينشر قبل وفاته، سبب اعتذار الدكتور أحمد زويل له بعد حلقته في برنامج "هذا المساء".

كواليس لقاء أحمد زويل
وقال خلال برنامج "بالخط العريض" المذاع على قناة "الحياة": "أستاذتي سيدة الإعلام آمال فهمي قالتلي أنا هجيبلك الحائز على جائزة نوبل في العلوم الدكتور أحمد زويل علشان يسجل معاك في برنامج "هذا المساء" فدعين ناس آخرين يكونوا موجودين ومنهم الكابتن شوبير وليلى طاهر وسمية الخشاب وأحمد عدوية والمخرج محمد عبد العزيز، علشان يكونوا مجموعة نفتح معاها الحديث، فجاء الدكتور زويل فوقف على الباب بص للمجموعة وحسيت أنه اتخض لأنه فاكر أنه جاي يعمل ندوة علمية ويتحدث عن الفيمتو ثانية اللي عليها خد جائزة نوبل، فجريت عليه على الباب وقلت نورت يا دكتور فقاللي هو ده التسجيل اللي أنا هكون فيه فقلت له أيوا، وسألني هل المجموعة دي تتناسب مع الحديث اللى إحنا هنقوله عن جائزة نوبل والفيمتو ثانية، فقلت له أيوا أنا هدفي في الإعلام أوصل رسالة للمتلقى لجمهور عدوية وشوبير وليلى طاهر وسمية الخشاب يعني إيه فيمتو ثانية فأرجوك امنحنا تلك الفرص لجمهورهم العريض فأقتنع أخيرًا".
حديث أحمد زويل عن الفيمتو ثانية
وتابع سمير صبري: "بدأ الدكتور زويل يتحدث عن الفيمتو ثانية، وقعد يتكلم ويكرر كلمة بالاس وأنا مش فاهم، وسألني فهمت فقلت له الصراحة أنا مفهمتش، فسألنا اللى موجودين فعم الصمت، فطلبت منه يبسط المسألة أكتر وقعد يبسط خالص لحد لما تقريبًا الرسالة وصلت، فسألت عدوية فهمت يعني إيه فيمتو ثانية فبص ليا وقاللى بالاس زي ما الدكتور زويل بيقول، وأنا شايف أنى فهمت يعني إيه فيمتو ثانية".
أنهى ليلته بصلاة الفجر وقراءة القرآن.. مساعد سمير صبري يروي لحظاته الأخيرة |فيديو
نبيلة عبيد: سمير صبري كان إنسان خيّر وكنت ناوية أزوره قريب | فيديو
اعتذار الدكتور أحمد زويل
وأضاف: "انتهينا من تسجيلنا مع الدكتور زويل وسافر وبعد إذاعة الحلقة ب10 أيام لقيت تليفون جايلي من الولايات المتحدة فقالى أنا الدكتور زويل وعملت 6 أحاديث في مصر عن جائزة نوبل والفيمتو ثانية محدش كلمني عليها وبرنامجك جالي عليه مكالمات من جميع أنحاء العالم العربي بيشيدوا وفهموا يعني إيه فيمتو ثانية وأنا بتأسفلك أني جيت على مضد ومكنتش فاهم بس نظريتك في توعية الرأي العام هي الصح وزي ما قال عدوية بالاس".