عمرو أديب: البلد هتقعد تصرف لحد إمتى أحنا محتاجين فلوس.. بيعوا بنك القاهرة

قال الإعلامي عمرو أديب: "إسرائيل قررت تبيع البريد الإسرائيلي وبريطانيا باعت السكة الحديدية حتى ميناء حيفا باعوه، والهند باعت شركة الطيران الخاصة بيها، ورجب طيب أردوغان من 3 سنين باع للقطريين أهم مصنع دبابات عنده لأنه كان عنده أزمة اقتصادية وما حدش قال له حاجة وباع 10% من البورصة التركية للقطريين".

الصندوق السيادي الإماراتي
وأضافت خلال برنامج "الحكاية" المذاع على قناة "إم بي سي مصر": "هو أنتو عايزين نقعد بره العالم لازم يجي فلوس وندخل استثمارات، ومفيش مشكلة نبيع حاجات ناجحة، هو المستثمر هيجي يشتري حاجة فاشلة لأ طبعا لازم ياخد الشهد والنجاح، والصندوق السيادي الإماراتي دخل وجاي وراه الصندوق السيادي السعودي، ومفيش مشكلة وإشمعنا لما القطريين اشتروا البنك الأهلي سوسيتيه جينرال في 2013 محدش اتكلم".

عدم بيع المناطق السيادية
وتابع: "أهم حاجة لما نبيع الحاجة نبيعها بسعر عادل ويكون فيه شفافية نعرف مين بيشتري ومين بيبيع، ووارد جدًّا يبقى عندك حاجات إستراتيجية أنت متفرطش فيها زي مثلًا البنك الأهلي، لكن بنك القاهرة عادي جدًّا".

البنك التجاري الدولي
وأكمل: "إيه الحالة الهستيرية اللي عندنا لما ناس اشترت 18% في بنك التجاري الدولي، أو فوري أو شركة سماد، وسنغافورة راحت باعت 35% للملكة العربية السعودية واحدة من أهم شركاتها الزراعية".

استثمار الصناديق السيادية
ولفت: "أنتو عايزين الشركات اللي في مصر تعملوا بيها إيه؟ هي البلد دي هتقعد تصرف لحد إمتى احنا محتاجين فلوس ودخل، ومحتاجين نبيع ونستثمر ايه المشكلة في كده، والصناديق السيادية تحب تستثمر فلوسها في الأماكن الناجحة زي السماد".

مصير شركات القطاع العام
وتابع: "إيه أهمية ملكيتك للمونوريل؟ هو حد هياخده ويمشي؟ لما نبيعه احنا بنحط ضوابط وشروط في التعاقد، أنتو عايزين تستثمروا إزاي؟ كل افكاركم عن الاستثمار ايه؟ هو ايه اللي حصل في كل المتاجر بتاعتنا عمر أفندي وصيدناوي؟ في الاَخر المحلات دي لما قعدنا نعافر ونتمسك بيها ايه كان مصيرها؟ ايه كان مصير مصنع الحديد والصلب؟ مين اللى ضيعه؟ الدولة تعدل القوانين وتعطى مناخ للاستثمار وتعمل بنية تحتية ولا تدير الشركات، احنا كان عندنا فترة الدولة بتعمل ساندوتشات فول وطعمية للناس".
عمرو أديب: في ناس مصريين كان نفسها مصر تتغلب ويأبى الله إلا أن يتم نوره | فيديو
عمرو أديب: لازم المواطن يعدي مرحلة الغضب والصدمة.. احنا ضحايا الأزمة
طرح بنك القاهرة بالبورصة
وأكمل: "غيروا دماغكم شوية أنا ما بمهدش لحاجة، ولكن أنا جبت لكم أكتر من مثال للاستثمار في العالم، وأنا مش مسؤول عن أي حاجة، لكن أنا بقول أنتو عايزين بنك القاهرة في إيه؟ اطرحوه في البورصة، وانعشوا الاقتصاد، شغلوا ناس ودخلوا عملة صعبة والجار أولى من إخواتنا السعوديين والإماراتيين والكويتيين للاستثمار عندنا".