أنغام: غنيت قصيدة "أشواق" وعمرى 5 سنوات.. وعزفت بيانو في أولى ابتدائى | فيديو

قالت الفنانة أنغام: "والدي الموسيقار محمد علي سليمان لما كنت بعيط وأنا صغيرة كان يعزف لي على الكمنجة وقتها كنت بسكت لحد لما أهدأ وأنام، وفي عيد ميلادي الخامس اكتشفوا إني بعرف أغني".

قصيدة أشواق
وأضافت خلال لقائها ببرنامج "سهرانين" الذي يقدمه الفنان أمير كرارة بقناة "أون إي": "كنت جريئة في الغناء من صغري وأول حاجة غنتها كانت قصيدة "أشواق" لرياض السنباطي، ومكنتش بسمع في البيت أغاني عيال صغيرين، وقتها أبويا اتخض ساعتها ومش واخد باله إني مركزة وبحفظ".
عزف أنغام للبيانو
وتابعت: "بدأت أعزف بيانو وأنا عمري 6 سنين، وكان عندي شغف كبير بالمزيكا بفضل أسرتي الغنائية".

وقالت الفنانة أنغام في نفس اللقاء: "أغنية "سيدي وصالك" كانت جديدة في كل حاجة، ونقلت الأغنية المصورة في حتة تانية والمخرج أحمد المهدي كان كل شويا يعيد تصوير الكليب وتعبت فيها جدًّا".
دعم وردة الجزائرية
وتابعت: "وردة الجزائرية بعد كليب "سيدي وصالك" كملتني من باريس، وأنا فرحتي كانت قد الدنيا بكلامها لأنها كانت بتكملني في عز مرضها ومعرفش إزاي الكرم بتاعها كان غير عادي وقالت لي الأغنية هتكسر الدنيا وهتقولي وردة قالت، وقد كان الأغنية نجحت نجاح كبير".

حفلات وردة الجزائرية
ولفتت: "وردة الجزائرية لما ابتديت أغني كانت بتطلعني في معظم حفلاتها وكنت بطلع أغني قبلها وكانت بالنسبة لي فرصة عظيمة، وكترت جمهوري، وفي يوم من الأيام حطت صورتي جنب صورتها على الأفيش في حفل نادي الترسانة".

وأكملت: "حفلات وردة الجزائرية كانت مهمة أوي بعد أم كلثوم وعبد الحليم حافظ، والناس كانت بتقعد تتفرج بالليل في السهرة عليها، وهي من اللي ربوني فينيا وإزاي أقف على المسرح وآكل الناس".

أصوات مصرية تستحق الدعم
وأشارت: "فيه أصوات كتير تستحق الفرصة وإني أدعمهم ومنهم من البنات ريهام عبد الحكيم ومي فاروق وكارمن سليمان، ومن الأصوات الرجالي محمد الشرنوبي، وبعتبره ابني وصوت عظيم وموهوب جدًّا، وأحمد جمال، وبموت في صوت هيثم شاكر، وبهاء سلطان عشق ومن أجمل الأصوات اللي خلقها ربنا وعيني أديها للأصوات دي".
كواليس أغنية شنطة سفر
ولفتت في نفس اللقاء: "أغنية شنطة سفر، مهمة وفي وقتها لأن فترة كانت الشباب بتهاجر وكل بيت تدخله تلاقى شاب مسافر علشان أكل العيش، والشاعرة فاطمة جعفر إسكندرانية زيي وكتبتها علشان أخوها كان مسافر، وغنيتها وأبويا لحنها، وكانت بالمناسبة ما كانتش بتاعتي وأخدتها ودي كانت نعمة ورزق، وأنا أخدتها من أبويا علطول بدون استئذان، وأبويا أحرج شوية من الست ولكني قلت له دي فارقة معايا وعايزاها وغنتها، والمنتج اللي كان عامل لي الشريط ده توفي فكده ما كانش فيه إنتاج".
أنغام: ضيعت هدية ثمينة قدمتها لى شادية.. وهذا رأي أحمد زكي في صوتي|فيديو
أنغام تكشف رسالة وردة الجزائرية لها بعد أغنية "سيدي وصالك"
وتابعت: "بالصدفة اتعرفت على المخرج عاطف الطيب وعجبته أغنية شنطة سفر وقال لي دا فيلم قصير، وأنا شايف صورة للأغنية دي وقتها حسيت إن السماء بتتفتح لي وأنا اللي أنتجت الأغنية، وقتها طلب مبلغ كبير للإنتاج اللى كان مدته 4 أيام تصوير، وكان معايا جزء من فلوس الكليب وبعت عربيتي وبعد ما اتعرض الكليب اشتريت عربية".