مرسي والكرسي.. الحلقة الثانية

مرسي يسير في حجرته متوترا يجلس على فراشه لحظات ثم يتركه ويجلس على كرسي هزاز ويترك جسده مسترخيا ليتحرك الكرسي به للأمام والخلف ويسرح بذهنه في أحداث العام المنصرم متحدثا بصوت عالٍ مسموع "أنا كان مالي ومال الحكم ؟ أنا عمري مافكرت في يوم اني اكون رئيس ولا حتي وزير انا كان كل حلمي اعيش مستور ومش محتاج لحد انا إيه اللي خلاني أقبل أن الجماعة تنزلني الانتخابات واني اكون رئيس؟ آديني اهه فقدت حريتي وبقيت محبوس زي الفار.

أنا عملت للبلد دي كتير طول السنة اللي فاتت اللي مسكت فيها الحكم ده يكون جزائي منها ومن شعبها ومن جيشها وده السيسي اللي انا رقيته وصعدته في الآخر رد ليا الجميل وعزلني وشمت فيا الجماعه كلها بقي ده جزاء الخير اللي انا عملته فيه ؟

_يجيبه ضميره: ما انت كنت ناوي تقيله في آخر أيامك في الحكم
صوت مرسي: ما انا كنت حاسس أنه ناويلي على نيه مش كويسه وكان مبيتلي الشر
صوت ضميره: ماهو كمان اتحايل عليك كتير انك تتصالح مع المعارضه وترضي جموع الشعب انت اللي ركبت دماغك ورفضت تقدم أي تنازلات واتغطرست وقلت انا الشرعية
صوت مرسي: ما انا الشرعية
صوت ضميره: شرعيه ايه دي بس و30 مليونا طلعوا رافضين حكمك
صوت مرسي: ماهوفيه غيرهم كتير واكتر منهم كانوا عاوزيني ومتمسكين بيا ولحد دلوقتي سايبين بيوتهم وقاعدين في رابعة العدوية مستنين عودتي للحكم
صوت ضميره: عوده مين ياعم للحكم ؟ هو اللي راح بيرجع تاني بطل اوهام وفكر في اللي جاي حاول تعمل حاجه تخلي الجيش والسيسي والشعب يرضي عنك ويسامحك
صوت مرسي: هو انا بأيدي ايه اعمله دلوقتي وانا محبوس كده
صوت ضميره: في إيدك كتير اطلع قول أو ذيع من هنا انك خلاص رافض الحكم وأطلب من انصارك يلموا نفسهم ويرجعوا بيوتهم تاني
صوت مرسي: وفكرك حيسمعوا كلامي ولا حيقولوا اني قلت الكلام ده تحت التهديد وغير كده بديع حيقومهم ضدي وضد الجيش بديع مش حيقبل اني اصرح بكده
صوت ضميره: لأمته حتعمل حساب لبديع ماهو بديع اللي حطك في الموقف ده وفي الآخر سابك كده سيبك منه وارضي ضميرك
صوت مرسي: بس انا أصلح رئيس لحكم مصر
صوت ضميره: فوق بقي وبطل أوهام انت افشل رئيس حكم مصر وبعدين انت ماحكمتهاش اللي حكم الشاطر وبديع وانت كنت بتنفذ أوامرهم
صوت مرسي: طيب وانا كان بأيدي ايه اعمله ده انا حالف اني ما اكسرش كلمه أو اخالف طلب يطلب مني دي حكايه عهد ووعد وطاعه وولاء
صوت ضميره: العهد والولاء والطاعه لله عز وجل مش لأي بني آدم أو إنسان أو جماعة انت وغيرك مغيبين ومسلوبين الفكر والإرادة
صوت مرسي: الحل إيه دلوقتي
صوت ضميره: الحل انك تصدق انك مبقتش رئيس وانك ماتصلحش انك تكون رئيس وانك تصدق أن الجماعة انهارت وانتهت وانكم لازم تبدأوا من جديد بأسلوب جديد وماتضحوش بشباب الجماعه اللي انتم رامينهم في النار
صوت مرسي: خلاص انا حطلب اتكلم مع السيسي ونشوف حل للقرف ده

_مرسي يطلب من حراسه أن يبلغوا السيسي برغبته في الحديث معه ويتم نقل الأمر للسيسي ويصمت للتفكير في هذا اللقاء وينتظر مرسي قرار السيسي في قلق وتوتر !