رسالة إلى مينا

ياريت يامينا ياموحد القطرين.. تقدر تجينا ولو ليومين
تلم شمل الأهل والإخوان.. وتطفى نار قايدة بألف لسان
وتقضى على الظلم والطغيان.. وتوحد الأقطار اللي بقت تسعين
مصرك يامينا باتت حزينة.. مركب في بحر مش لاقى مينا
مصرك يامينا راقدة بتنزف.. وولادها وقعوا بطريقة تقرف
يقولولها قبل ما تموتى هاتى.. اللى عليكى ياولية لينا
أصل إحنا قمنا عملنا ثورة.. شهدت لها الدنيا بحالها
بعدين جماعة عملت مناورة.. محت محاسنها وجمالها
وبدال ما نمشى بكل همة.. ونصون بلدنا بضمير وذمة
مع الأسف قعدنا نخطط.. إزاى نهينها ونهد حيلها
الفوضى عمت في كل حتة.. وفى كل عب كبشة فيران
في أي شارع تلاقى جتة.. وياما تلقى في الميدان
مليون لسان وكأن قطة.. غبية أكلت كل الودان
ياريت يامينا أوام تجينا.. وتجيب معاك أكبر نيران
نصر حسن مصطفى