أحمد عزمي: إسعاد يونس قالتلي أنا مقهورة عليك وفرحانة برجوعك|فيديو

قال الفنان أحمد عزمي:"أحمد الله علي اختباره اللي فتح لي طاقة لرؤية حب زملائي والجمهور الصحافة وقد ايه فرحوني ودعموني وطبطبوا علي قلبي، وحسيت إني رجعت لحضن أهلي ودعوة أمي وأبويا بمحبة الناس ربنا استجاب لها".

سعادة أحمد عزمي
وأضاف خلال مداخلة هاتفية ببرنامج "كلام الناس" المذاع علي قناة "ام بي سي مصر":"لا يوجد كلام يمكنه وصف السعادة اللي انا عايش فيها دلوقتي".

مكالمة إسعاد يونس
وتابع:"كل الناس كلموني، ولكن صاحبة أغلي مكالمة كانت من الفنانة اسعاد يونس وقالتلي امبارح انا كنت مقهورة عليك واتقهرت عليك وانا اكتر واحدة فرحانة برجوعك ونعمل شغل اكتر من الأول".

قصيدة إسعاد يونس
ولفتت:"اسعاد يونس يوم ميلاد ابني اَدم كانت كتبالي قصيدة جميلة، وهي طول عمرها صاحبة السعادة".


ووجه الفنان أحمد عزمي، في تصريحات سابقة، نداءًا للوسط الفني، من أجل عودته للتمثيل مجددًا بعد أزمة القبض عليه إثر تعاطيه المخدرات.

مناشدة أحمد عزمي للوسط الفني
وقال أحمد عزمي، خلال لقائه ببرنامج "كلام الناس" المذاع على قناة "إم بي سي مصر": "صدقوني أنا ندمان واتغيرت وبقيت واحد تاني واستحق فرصة تانية وأكون موجود في عمل واختبروني وجربوني وشوفوا اذا كنت لسه زي ما كنت تعرفوني ولا لأ".

زواج أحمد عزمي
وتابع: "الحمد لله ربنا أكرمني بزوجة واتجوزت تاني واستقريت وبقيت أفكر في حياتي، بعد أزمة السجن، ونويت من جوايا افتح صفحة جديدة ومش هفتح أي أبواب لخطوات الشيطان تاني".
أزمة أحمد عزمي
ولفت: "لما خرجت من السجن كنت مكسوف من نفسي وكان عندي احساس اني عامل عاملة بس الحمد لله أنا بقيت كويس واستقريت".

وقال الفنان أحمد عزمي في نفس اللقاء، إن فيلم "الوعد" كان آخر عمل جماهيري شارك فيه، لافتًا إلى أن مصر دخلت في حالة فوضى بعد ثورة 25 يناير على إثرها تعرض لسرقة سيارته أكثر من مرة.

وفاة شقيق أحمد عزمي
وأضاف خلال لقائه ببرنامج "كلام الناس" المذاع على قناة "إم بي سي مصر": "الأمر اللي خلاني ما بقتش قادر أواجه الدنيا مقتل أخويا حمدي اللي اتقتل بحادثة بشعة تعرض فيها ل 13 طعنة في جسده، بسبب مشاجرة بينه وبين أحد الأشخاص، وقتها حسيت إن مصر ما بقتش بتاعتنا، وما بقتش حاسس بالانتماء اللي كنت حاسه قبل كده وقتها كان الحل إني روحت شرم الشيخ واشتريت شاليه وفقدان التوازن بدأ يزيد وابتعدت عن كل الحاجات الحلوة اللي بحبها".

تعاطي الكحول والمخدرات
وتابع أحمد عزمي: "لما رحت شرم الشيخ اتكون حواليَّ مجموعة من الأشخاص ودخلت في دوامة الكحول اللي هو بداية لكل مفسدة وبدأت تعاطي المخدرات ودخلت في اكتئاب مع انفصالي عن زوجتي".

خلع أحمد عزمي
ولفت: "مراتي كان معاها حق انها تنفصل عني وتخلعني علشان تنقذ آدم ابني لأني ما كنتش مسؤول عن تصرفاتي، وفي 2012 اتقبض عليا في شرم الشيخ بتعاطي المخدرات وفي 2013 اتحكم عليَّ بالسجن".

وقال الفنان أحمد عزمي في حديث سابق، إنه دخل عالم التمثيل في سن ال12 عامًا موضحًا أن المسلسل الإذاعي "شقائق النعمان" بطولة الفنان والمخرج جلال الشرقاوي والفنان عزت العلايلي، شهد الظهور الحقيقي له.

بعد مناشدته.. تعرف على أبرز الأعمال الفنية ل أحمد عزمي
أحمد عزمي للوسط الفني: أنا ندمان واتغيرت وبقيت واحد تاني.. اختبروني | فيديو
وأضاف أنه بعد مشاركته في مسلسل "شقائق النعمان" كانت لديه رغبة قوية في الاستمرار في عالم التمثيل وحلم بدخول المعهد العالي للفنون المسرحية بعد حصوله على الثانوية العامة.