غراب البين يكتب: ستات الروتين اليومى وشركات المحمول

زى كل يوم كنت واقف بتشمس على بلكونة الواد "محمود أبو نسمة".. محمود جايب للمدام "راوتر هوائى محمول" علشان تشتغل عالنت براحتها لأنها بتقدم فيديوهات "روتين يومى" على اليوتيوب والفيس بوك.. بيقولوا إن الفديوهات دى بتجيب مشاهدات كتير وبالتالى فلوس كتير.. ومحمود ظهرت عليه النعمة بس عامل نفسه من بنها وفاكر إن محدش عارف حكاية مراته بتاعة الروتين لأن أم نسمة بتقدم الفيديوهات مرتدية النقاب وهى برضو فاكرة إن ماحدش يعرفها بينما اهل القرية كلهم عارفين وفاضحينها فى كل حتة

صوت أم نسمة عالى جدا وواضح انها غضبانة علشان الراوتر مش بيشتغل رغم انها جددت الباقة من يومين.. أم نسمة من امبارح وهى بتتصل بخدمة العمملاء ومش لاقية أى حل.. كل مرة يقولولها إقفلى الراوتر وافتحيه تانى.. وهى تصرخ وتقول شلتها وحطيتها سبعين مرة وبرضو مافيش فايدة.. طب اطلبى الدعم الفنى على رقم "ثلاث تمنيات" وهو هيحللك المشكلة.. تصرخ وتتنطط وتقول طلبته وقالى اقفلى الراوتر وشغليه تانى
طب معلش هدئى أعصابك يا فندم واطلبى "تلات ستات" وهو هيحولك على تلات تمنيات وإن شاء الله خير
أم نسمة تصرخ وتتنطط وتشد فى شعرها وتقولهم طلبت كل الارقام وبرضو بيقولولى اقفلى الراوتر وشغليه تانى وبرضو مافيش فايده.. يا ناس انا شغلى متعطل "والفولورز بتوعى هيطفشوا منى"
أبو نسمة واقف مش عارف يعمل إيه علشان يهدى أم نسمة وأنا وقفت على رجلى ونفشت ريشى وأخذت أنعق قاق قاق فراح أبو نسمة يهشنى وأم نسمة تصرخ وتقول غور من هنا الله يحرقك جبتلنا الفقر والنكد ووقفت حالنا

وهنا أخذت زيلى فى أسنانى وقلت يا فكيك قبل أن يحدفوننى بالطوب ولسان حالى يقول: بقا أنا اللى جبتلكم الفقر يا شوية بنى آدمين يا بتوع السبوبة على حساب أى حاجة؟!.. يعنى شركة محمول مطلعة عين الناس وقرفاهم فى حياتهم وكل همها تلم منهم فلوس وبتستغل حاجة الناس للنت والواى فاى.. وستات آخر زمن بيعرضوا أجسادهم للعامة فى فيديوهات الروتين اليومى وزوج ديوس ساكت ومطنش وعامل نفسه من بنها وكل دا علشان يجمعوا فلوس من المشاهدات على حساب أى حاجة.. ياخى جاتها ستين ألف نيلة اللى عايزة تخلف بنى آدمين زيكم!
غراب البين