رمضان جانا والمرشد مش معانا !!

خير اللهم اجعله خير وأنا أحلامي بقت قليلة الأيام دي وما بقتش باحلم كتير ده لأن أصلا الواحد ما بقاش بينام يا إما من صوت الصواريخ والاحتفالات " لو إنت قاعد في مدرجات الدرجة الثالثة " أو من صوت ضرب النار والرصاص وطاخ طيخ طوخ " لو إنت قاعد في مدرجات الدرجة الثانية" أما باقي الناس إللي قاعدة في مدرجات الدرجة الأولى في التكييف وبتنزل تاكل ذرة وسوداني دول مالناش دعوة بيهم لأنهم مش حاسين بحاجة أصلا.
نهايته يعني.. حلمت والحلم بالمرشد نصرة.. آه والله نصرة.. خير اللهم اجعله خيرا إن مرسي رجع تاني والمرشد بقى إمبراطور وعينوا الكتاتني مسحراتي.. ودار يقول في البلد:
يا أهالي المحروسة سنزرع لكم الفراولة بدلا من الكوسة وسنجعل كل الآيات معكوسة.
يا أهالي مصر مصيبتكم فاقت العدد والحصر والثورة عمرها ما هتدخل القصر.
يا أهالي البلاد.. لا إعلان دستوري ولا قضاء هينفعكم من إيد الجلاد.
وأنا سمعت الجلاد من هنا فأدركت شهر زاد الصباح وسكتت عن الكلام المباح وصحيت من النوم لا لقيت مسرور ولا المرشد ولا أي حاجة من دي.. حمدت ربنا واتأكدت أني جبت كنافة ومكسرات وأن رمضان جه فعلا.. والجماعة مش في الحكم.
ولعت فانوس وقاعدت أغني.. رمضان جانا والمرشد مش معانا.. أهلا رمضان!!