الرئيس اللى ييجى بالزيت والسكر.. نهايته عيش وحلاوة!

فرحة غامرة سادت شباب "فيس بوك" بعد عزل مرسي، وسادت التعليقات الساخرة في الصفحات الثورية ابتهاجا بعزل مرسي، "فيتو كافيه" رصدت أبرز تعليقات الشباب..
محمد عادل: ليه يا مرسي كده يا مرسي.. بتعيط ليه دلوقت.. مانت اللى عصبتنى يا أخى..
كريم الشريف: خطابات عدلى منصور ما بتضحكش.. ارجع يا مرسي احنا كنا بنهزر معاك..
عماد السافوري: احنا ممكن نعاقب مرسي بإننا نديله استمارات ونخليه يرجع كل استمارة لصاحبها..
الشينيرال: الرئيس اللى ياخدها بزيت وسكر أكيد هتنتهى معاه بعيش وحلاوة..
رامي عبد الفضيل: إحنا بقينا شعب بيتكيف ويتبسط ويتمزج بخلع أي رئيس...
تامر سليم: رجعناه بعد سنة.. قبل ضمانة ما يخلص..
محمد منصور: والحمد لله احنا في السليم.. دي عيوب المصنع..
حمدي الدودج: سأفتقد خطابات مرسي....أول ستاند أب كوميدى مدنى منتخب..
عادل عبد الوهاب: أول مخلوع مدنى منتخب..
أحمد حامد عبد الغني: 368يوم تعاسة..
نور الدين عبد الحميد التوني: عصر اللمون وعصر النهضة والعصر الطباشيرى..
محمد جمعة: احنا أول شعب في التاريخ عنده رئيسين.. ديكتاتوريين مخلوعين ورئيس مُعين ورئيس هاينتخبه كمان كام شهر جميعهم على قيد الحياة...سينحنى لكم التاريخ إعجابا..
رائف جميل: يعنى يخلعوك وميقولوش اسمك في البيان ولا مرة.. يا كبدى.. طب مش قايل اسمك في البوست..
إبراهيم الجارحي: مفروض سجن وادي النطرون يفتح الزنزانة ويهويها ويغير الملايات وكساوي المخدات..
محمد فاروق: بعد ما مرسي بيته اتخرب هندعى بخراب بيت مين بعد كده؟
غادة عبد الكريم: تعرف اللى محزنى ودخل القهر جوه قلبى.. أن لما صباع رجلى الصغير يتخبط في الكومدينو مش هاعرف أقول تانى الله يخرب بيتك يا مرسي..
رحاب حسن عبد الرءوف: الإخوان كانوا بيعايروا بتوع الحزب الوطني ويقولوا لهم يا فلول.. الإخوان الآن كلهم فلول..
شادية عبد الحميد: طب اللى بيموت بيلبسوله اسود.. واللى بيتحدد إقامته ده يلبسوله إيه؟ اديداس ؟!