إحنا خلعناه.. وحاكمناه!

قرأت مقالكم المنشور فى «المصرى اليوم».. بعنوان «رئيس جمهورية طرة».. وذكرت أغنية «اخترناه».. وأرسل لكم هذا العمل.. الذى أصالح به نفسى وأرد اعتبارى.. هكذا قال الشاعر مصطفى الميرى، وهكذا كتب قصيدته «إحنا خلعناه»:
وعشان كده إحنا خلعناه
من أول مرة سمعناه
بس يا ريت ما مشينا وراه
لا عمره فهمنا ولا فهمناه
وعشان كده إحنا خلعناه
بعد ما كنا استأمناه
خرب البيت وقرفنا معاه
مش تكليف ده كان تخريف
وعشان كده إحنا خلعناه اه
ضيع حلم الجيل والأجيال
الجاية وراه
وعشان كده إحنا خلعناه
وعشان كده إحنا خلعناه
من غير لجنة ولأ وآه
رأينا حر وأعلناه
قلنا كفاية الذلة معاه
وقلنا خلاص إحنا خلعناه
مش تكليف ده تخريف
وكان فخفخة وملك وجاه
ده ابن بلدنا وهوه قائدنا
وبدأنا المشوار وياه
وإحنا وراه لمشاااااااااء الله
وهنخرب بيته إن شاء الله
حتى إن كان هيدينى ويرقينى
حد الله بينا وبينه
ولا مصلحه بينه وبينى
إلا بلدنا وحب بلدنا وبقولها
ورزقى على الله
علشان كده إحنا خلعناه
وإحنا وراه لمشاء الله
لما يرجع كل فلوسنا
ويلم الخونة اللى وراه
وعشان كده إحنا خلعناه
بعد سلامنا ورفع علمنا
نص العالم كان مخاصمنا
بعد ما جه بالظلم معاه
حتى الإخوة أهل النخوة
تعبوا وشافوا الويل وياه
علشان كده إحنا خلعناه
واحنا وراه لما شاء الله
وعشان كده إحنا خلعناه
قولنا وقالوا له وعياله
مش سايب حد فى جرناله
واما يحاسب حد معارض
عمره ما ساب حد وما أذاه
علشان كده إحنا خلعناه
اخترناه معرفشى إزاى
إحنا اخترناه
اللى جابوه منهم لله
أول مره يا مصر يا حرة
نقفل باب الشر ورااااااه
بعد ما مرر فينا ودمر
يبدأ عهد سلام وحياة
علشان كده إحنا خلعناه
إحنا وراه لما شاء الله
وهنبعت كل كلاب وراه
ظالم وبيحكمها بكل غباء
يفتح جيبه لكل حبايبه
قاعدين على المصطبة وياه
خلى بلدنا لسيده وسته
وخالوه وخالته وحتى حماه
علشان كده إحنا خلعناااه
اخترناه معرفشى ازاى إحنا اخترناه
وعشنا معاه واستحملناه
كان بصراحة وكل وقاحة
كل مصايبه تكون بالراحة
عشان الشعب يعيش فى غباه
وبيحكلنا عن مشاكلنا ويقولنا
على البير وغطاااااااااه
وعشان كده إحنا خلعناااااه
كان عايز مصر خرابة
وكل الشعب يعيش بعماه
ونمشى وراه لما شاء الله
وعشان كده إحنا خلعنااه
كنا فى زنقة وعوزة وخنقة
وديونا تكتيفة وشنقة
رسم الخطة ألف محطة نصها والباقى وراه
وعشان كده إحنا خلعناه
وإحنا وراه لما شاء الله
كانت غلطة اخترناه اخترناه
بدأ السكة وفكها فكة
باقى علينا شوية فكة
والشعب يبيع اللى وراه
والمستقبل وإحنا معاه
علشان كده إحنا خلعناه
اخترناه اخترناه
معرفشى ازاى إحنا اخترناه
عاش يخدعنا ويطمعنا
بكلام إنشاء ملهوش معنى
وعشان كده إحنا خلعناه
ومش عايزينه إن شاء الله
روحكم سمحة أدب ومصالحة
صافى القلب يا كفر مصيلحة
جبتوه ليه منكم لله!
نازل نهب فى خلق الله
علشان كده إحنا خلعناه
فقنا وشاف الشعب هناه
وعشان كده إحنا اخترناه
وكسرنا ميت قلة وراه!