مظاهرات مصر تدخل موسوعة جينيس

النهاردة نزلت ميدان التحرير، أقسم بالله عمري ما شوفت يوم زي الزحمة دي حتي في ال18 يوم بتوع الثورة، دائما كنت بنزل بس مكنتش ببقى من الثوار كنت بنزل اتفرج وامشي، النهاردة حسيت إني محتاج اقف، محتاج أحس واعرف يعني إيه شعب يثور، يعني إيه مصر تنتفض، أنا كشاب محتاج أحس أن بلدي ليها قيمة وأنا ليا قيمة؛ النهاردة حسيت بقيمة وطن بحجم مصر، النهاردة عرفت ليه ممكن يتخاف مننا ويتعمل لمصر ألف حساب.
لما رجعت البيت لاقيت صفحات إخوانية بتقول الآتي: عدد متظاهري التحرير مليون - الاتحادية..300 ألف - المنصورة.. 20 ألفا - المحلة... 200 ألف - الإسكندرية 500 ألف - باقي المحافظات 500 ألف.
مجموع الأعداد 2 مليون و700 ألف؛ مجموع عدد المتظاهرين برابعة العدوية 4 ملايين؛ كنت عاوز أقول لفظ خارج بس استعيبتها بصراحة، فقولت حسبي الله ونعم الوكيل، مش بعيد عليهم يقولوا كدا ما هو من غباوتهم هنعمل إيه في الآخر أحب أقول وبقلب جامد تحيا مصر، النهاردة مظاهرات مصر دخلت موسوعة جينيس،،،،،،، تحيا مصر.