أبين زين واضرب الودع للمصريين

أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف
ارمي بياضك يامصر.. الرمل بيقول إيه.. علشان كمان الودع هيقول كلام مداريه.. ولحد إمتي اللي حاصل تفضلي كدا فيه.. الرمل بيقول لا ممكن تقدري تخبيه.. وكل يوم فيه خلاف ع السلطة وبنخفيه.. وناس تعارض في ناس.. طب قولي ثايرين ليه.. كله بيحلم بكرسي الحكم يبقي عليه.. ومش مهم البلد والناس عشان أمانيه.. يقدر يحققها والكرسي بقي يغطيه.. وأقول لك إيه وللا إيه يامصر.. سري خافيه.. قولي لولادك هاضيع م اللي إنتو ماشيين فيه.. أنا وطنكم بلاش بالاختلاف تعاديه.. وعيب كدا وحدوا كلمتكوا في معانيه.. وصدقوني الندم ما بينفع الندمان.. وهتفضلوا في العراك تايهين كمان وكمان.. فبلاش بقي طنطنة وبطلوا زوغان.. وفكروا في البلد كله يعيش في أمان.. لا كرسي هيدوم لحزب معارضة أو إخوان.. وكلكم محبوسين في خانة التوهان.. يامصر قولي لولادك فجروا البركان.. واتوحدوا فيه أمل والحق يوم حيبان.. خليكوا فاكرين كلامي ياكافة الإخوان.. أنا مصر اللي تلاقوا اسمي في القرآن.. حرام عليكم أضيع منكم وكان ياما كان.. وبكره راح تعرفوا ودعي ماهش غلطان.