يوميات رئيس.. حلقة رقم (3).. نقطع الميه والنور يوم "30"

يدخل مدير مكتبه فرحان ومبسوط قوي وهو يقول: الجماعة وجدت حلا إنما ايه عنب يا زميلي
الريس يمط شفايفه متعجبا: خير إن شاء الله ما هي الأفكار الحلوة بتيجي من المقطم بس.
مدير مكتبه: حل عبقري جدا هنقطع النور والميه عن المتظاهرين.. اظن دي تبقي ضىربة في مقتل يا معلم إيه رايك؟
الريس وهو زعلان: ياراجل ونسيتم الشمع
مدير مكتبه ضاحكا: ياريس ما هي دي المصلحة نفتح سوبر ماركت لبيع الشموع بس.
شوف أنت بقي كام متظاهر يعني كام شمعة والله الخير جاي ياريس.
الريس: ومين صاحب الفكره دي ؟
مدير مكتبه: حبيبك الشاطر فكره إنما ايه عنب.
الريس: طيب افترض أن حركة تمرد كشفت الملعوب وعملت كشك شمع متنقل هنعمل إيه يا فالحين.
مدير مكتبه بصوت واطي جدا: ومنين هتعرف الموضوع سر سر يا كبير يعني لو عرفت يبقي فيه حد بينا خاين صح؟
الريس حزين: نفسي اعرف بتوع تمرد عرفوا موضوع الإسهال اللي كان عندي إزاي؟
مدير مكتبه وشه يصفر ويحمر ويتعلثم في الكلام: تتفتكر مين اللي قال؟
الريس يشد شعره: اللي مجنني إن كل حاجة عارفينها عني كأنهم عايشين معايا ازاااااااااااااااي ؟
مدير مكتبه: والله ياريس كله يتراقب نتفق مع كام مخبر مخضرمين ونشوف مين الخاين إيه رأيك؟
الريس: مخبر إيه بعد الثورة مفيش مخبرين كانوا زمان على أيام المخلوع.
ويحط يده على قفاه اللهي لا تعودها أبدا.
مدير مكتبه: طيب هنعمل إيه
_يرن تليفون الريس المباشر.
مدير مكتبه: أيوه تحت أمرك السمع والطاعة اتنفذ ياكبير ربنا يخليك لينا يا معلم ويقفل وهات يارقص مش قلتلك هتبقي فله.
الريس مبتسما: فرحني ايه هنلغي يوم 30.
مدير مكتبه:لا هنفتح كافيه للشاي والقهوة والحاجة الساقعة وأكل وشرب ولا مؤاخذة حمامات متنقلة وكل واحد يدفع "جنيه" ونأخد أرضية من البياعين ويصرخ دي هتبقي عنب يا معلم.
الريس: وحياة أبوك هتبقي عنب؟
مدير مكتبه: طبعا عنب وجوافه كمان ولو القعدة قدام القصر طولت لحد رمضان نعمل مائدة رحمن والوجبة بعشرة جنيه إيه رايك يابرنس؟
الريس: دي مصلحه كويسه قوي.
مدير مكتبه ضاحكا: طب خد دي والمولوتوف عندنا "بمب" صناعة حماس وهنبيعه لحبايبنا المتظاهرين
الريس: ومين بقي اللي هيعمل الكلام ده ؟
مدير مكتبه: حبيبك اللي عمره ما خسر اللي عنده كل حاجة من الإبرة للصاروخ وكله عشانك يا مصر عايزين نعوض اللي خسرناه في الانتخابات يا زومل.
الريس بعد تفكير: تصدق أنا كرهت الإخوان وكرهت نفسي وكرهت اليوم الأسود اللي بقيت فيه ريس!!