نشطاء تويتر: مليونية رابعة تؤكد خوف الإخوان من 30 يونيو.. "تهاني": قتلة الأمس حكام اليوم.. "هشام": الحشد رسالة تطمين لأمريكا.. شباب الإخوان: عددنا في الميدان وصل إلى 5 ملايين

علق الكثيرين من النشطاء السياسيين في هشتاج على مليونية نبذ العنف بميدان رابعة العدوية، فقد أكد بعضهم أن هذه المليونية على أقصي تقدير لا تتعدي 54 ألف شخص، وأن إقامة تلك التظاهرة تدل على مدي خوف تيار الإسلام السياسي من خروج المصريين يوم 30 يونيو لإسقاط شرعية الرئيس مرسي، في حين ذكر شباب الإخوان أن عدد المتواجدين في الميدان بلغ 5 ملايين ويرد عليه إخواني قائلًا: "بلاش هبل".
وعلقت المستشارة تهاني الجبالي، نائب رئيس المحكمة الدستورية السابق، "قتلة الأمس.. حكام اليوم".
بينما قال دكتور هشام صلاح: "حشد النهارده ده الإخوان بيبعتوا بيه رسالتين: الأولى للجيش علشان مايفكرش.. والثانية لأمريكا علشان تطمئن على وكيلها وبأنه لسه عنده شعبية"!.
وقال الناشط السياسي أكرم القصاص: "أحد نابذي العنف رافع يافطة" نقطع رأس كل من يقول إن الإسلام يحض على العنف" دا تلميذ نجيب لعاصم نابذ".
ومن جانبه، قال إبراهيم: الناشط السياسي "لما الإخوان يضطروا يشحنوا ناس من الأقاليم يبقوا بيبلغونا رسالة واضحة: إحنا قليلين فشششخ!".
وقال محمد رضوان: "على فكرة مكتب الإرشاد بيهرج وفيه تخبط.. إزاى أردوغان يعمل وقفة الآن في ميدان قيصرى بوسط تركيا بالتزامن مع رابعة العدوية".
وقالت مي عطوان: "نرجع تاني للقرف، والله العظيم بعد ماسمعت المعاتيه اللي كانوا بيخطبوا في مليونية لا للعنف أمنت أكتر بالثورة ومدنية مصر.. يسقط حكم المرشد".
محمد بن خالد: "مليونية لا للعنف..تمرد.. لن ينفع مرسي لا صياح ولا نباح فقد قربت ساعة الحسم ياجماعة الإخوان".
نجوان: "مليونية لا للعنف حرف الجر لا ده مالهوش أي موقع من الإعراب في الجملة دي".
وقال محمد فتحي: "أجمل حاجة في اللي بيحصل دلوقت ف رابعة العدوية أنه بيقول للناس اللي نازلة يوم 30 لازم تنجحوا.. مش دي الناس اللي تحكم بلد زي مصر.. مصر أكبر".
وقال عمرو حمدون: "مساحة رابعة العدوية الكاملة 6735 لنفترض متر مربع بيشيل 8 لو هما رفيعين يبقى ميدان رابعة العدوية بالكتير يشيل 54 ألف شخص"
وقالت رغدة السعيد "أنا شايفة إن استعراض القوة ده أحسن دعاية ليوم 6/30".
وقال محمد فقط " ههههههه تدريبات قتالية للإسلاميين في جمعة لا للعنف.. فاصل كوميدي لا يفوتكم مصر".
وقالت إيناس الحسيني: "إيه الأغنية اللي فيها جماجم ودماء دى.. هو ده مش مفروض إن ده صراع سياسي ولا إحنا داخلين على حرب.. يعني نبني سواتر ترابية قدام البيت ولا إيه؟".
وقال أشرف المهدي: "الملايين الرابضين الآن في الشوارع بروفة بسيطة لما سيحدث عقب السطو على محمد مرسي.. ثورة إسلامية خالصة بدستور إسلامى خالص..دعونا ننتظر".
وذكر منتدي شباب الإخوان عن مليونية رابعة العدوية "بلغ العدد الآن بعد حصره تماما والعد بناء على الوجبات المقدمة إلى 5 ملايين.. الله أكبر الله أكبر الله أكبر".
ورد أحمد رمضان: "مع شديد احترامى وعلى فكرة أنا إخوان بلاش هبل.. كفايه بقى تشويه لصورتنا كفايه حرام عليكوا.. اتق الله يا أدمن إذا كنت إخوان أصلا وأنا أشك في ده".
أسامة غريب قال" يخيل لي أن تظاهرات الإسلاميين وحشودهم الغفيرة غير موجهة لجبهة الإنقاذ أو حتي للفلول وإنما موجهة لمؤسسات القوة اللي ممكن تكون بتشاور عقلها!".