كوبانية «جوندن فينجن»

كام واحد من شباب الثورة اتحبس عشان منشوراته على الفيس بوك.. الفلاني بتهمة إهانة الرئيس والعلاني عشان التحريض على الثورة.. وغيرهم كتير واللي مشترك بينهم ودليل الإدانة ليهم هو «الفيس بوك».. متخيل الواحد منهم كدا وهو داخل «الكلوب» قصدي السجن وقابل عمنا محمد رضا أو جلجل أبو شفطورة في فيلم 30 يوم في السجن يا ترى الحوار هيكون بينهم إزاي..
جلجل أبو شفطورة: اسمك إيه
الثوري: دومة
جلجل: «بضحك هيستري» أومة إيه يا أخويا الأسامي دي "ضحك من جميع المساجين"
دومة: واسمك إيه بقى
جلجل: إيه يا أخويا الجهل دا في حد في الكلوب دا كله ما بيعرفش جلجل أبو شفطورة
دومة: تورة.. دي مرات التور «يضحك ولا يشترك معه أحد في الضحك»
جلجل: وريني إيديك كدا....دي حاجة وردناني خالص.. دا أنا كنت فاكرك تنفع في الكوبانية
دومة: كوبانية
جلجل: آه كوبانية الصوابع الدهبية «جوندن فنجن» اللي أنا كنت عاملها أنا وصديئي جميس بوند.. دا صاحبي ومتربين في حتة واحدة إش ربنا فاتح عليه هو وراح هوليوود وأنا جيت هنا وشرفت في اللومان
دومة: أرزاق يا معلم
جلجل: آه كنا شلة واحدة جلجل وجميس بوند وعلي بوند وإسماعيل بوند
دومة: ودول مين بقى
جلجل: إخواتي أصلنا تلت شقايق كل واحد مننا متخصص في صنف.. أخويا الكبير على بوند أخدها وراثه عن الوالد والوالد طواحيني كان يدب الطفاشة في أجدعها خزنة تدوب في إيده زي حتة الحلاوة السمسمية وأخويا الوسطاني كان من غير لا مؤاخدة ملقاط
دومة: ملقاط يعني إيه يا معلم
جلجل: يعني نشال بلغتكم أنتوا يا زباينا يا كرديات
أما أنا بقى بحب الشغل الخفيف المستريح أشوف حتة الغسيل بتهفف من عن السطوح قلبي يهفف من هنا اقصه من هنا ومن هنا وكان الله بالسر عليم.. وأنت بقى ايه اللي حدفك هنا قتل ولا سرقة
دومة: لا
جلجل: أمال إيه اللي جابك
دومة: فيس يا معلم
فيس: أنا عمري ما شفت واحد دخل الكلوب عشان فيس.. أنت باين عليك مجنو.. مجنون يعني
دومة: مجنو يعني مجنون
جلجل: أصل أنا بقص الكلا.. الكلام يعني
دومة: عشان حرا.. حرامي يعني
جلجل: وكتبت إيه بقى على الفيس جابك هنا
دومة: أبدا يا معلم كتبت يا رب صبرنا على ما بلانا.. قاموا جابوني هنا
جلجل: تصدق باللي خلقك دول عالم مجا.. مجانين يعني!!!!!!!!