كنباوي وكنباوية.. حلقة (58).. يا عيني لما العساكر تتخطف يا ولاد!!

كنباوية تحدث نفسها وكنباوي ينظر لها كالعادة
كنباوية: عشنا وشوفنا عساكر الجيش والشرطة بتتخطف يا ولاد زي ما يكونوا بيادق وعساكر شطرنج؟
كنباوي: مالك يا كنباوية؟ اهدي وصلي على النبي إن شاء الله خير
كنباوية: وحييجي منين الخير بس دول أهالي العساكر حيتجننوا يا ولداه عليهم قلوبهم بتتقطع يا كبدي عليهم مفطورين على ولادهم اللي ماحدش عارف همه فين؟ بياكلوا ويشربوا ولا بيتعذبوا ولا اتقتلوا ولا إيه مصيرهم؟
كنباوي: إن شاء الله ما يكونش حد أذاهم بسوء بإذن الله
كنباوية: يا ريت يا كنباوي دول مالهمش ذنب في حاجة خالص غير إنهم مصريين
كنباوي: إن شاء الله حيرجعوا لأهاليهم سالمين بس انتي قولي يا رب
كنباوية: يا رب يا كنباوي يا رب
كنباوي: الجيش هيعمل إيه؟
كنباوية: الجيش عاوز يدك المجرمين اللي خطفوا العساكر ومرسي مش عاوز
كنباوي: مرسي مش عاوز! اشمعنى؟
كنباوية: عايز يحل بالحسنى والحل السلمي
كنباوي: وهي دي ينفع معاها حسنى ولا حل سلمي؟
كنباوية: ما هو اللي عرقلها لما وافق في الأول على طلبات الخاطفين إنه يطلع قرايبهم المحكوم عليهم في قضايا ومحبوسين قصاد إنهم يفرجوا عن العساكر والسيسي رفض
كنباوي: والسيسي رفض ليه؟
كنباوية: رفض لأنهم قتلوا ظباط قبل كده وسرقوا بنك وخطفوا عساكر وضباط يعني مجرمين ولاد كلب والسيسي بيقول لو احنا كل شويه اللي ليه مسجون يروح يخطف ظابط أو اتنين عساكر ويطالبنا إننا نخرج له مسجون علشان يسيب لنا المخطوفين وتبقى حكاية مش فايته والبلد تبقي سايبة وبعد كده ما نلقاش ولا مسجون واحد في أي سجن
كنباوي: الراجل بيتكلم صح وعنده حق ومرسي غلطان
كنباوية: مرسي خايف لأن الخاطفين فيهم إسلاميين وناس بتنتمي لتنظيم القاعدة وفيه إشاعات بتقول إن فيهم أصحاب لخيرت الشاطر
كنباوي: هو ده وقت أصحاب ومش أصحاب؟ مرسي كده بيهرج وبيقلب البلد
كنباوية: ده الجيش شايط من مرسي ومش طايقه خالص
كنباوي: له حق
كنباوية: ده المتحدث الرسمي للجيش قال يا مرسي يبقي رئيس بجد يا إما يسيب الحكم للي يقدر وواحد من الإخوان رد عليه وقال له عيب تتكلم على سيادة الرئيس بالشكل ده
كنباوي: دي قلة أدب
كنباوية: الجيش استعد وبعت قاذفات صواريخ ومقاتلات وكتايب من الجنود والعساكر والظباط بقياده اللواء أحمد وصفي لسينا ده غير إنه نشر قواته على الطرق المؤدية لسينا وبيفتش اللي داخل واللي خارج ده غير كمان إنه استعان بفرق مكافحة الإرهاب والفرقة 777 والفرقة 999 وسينا اتبدرت بعساكر وجنود وظباط الجيش والكل مستني ساعة الصفر خاصة أن فرق العمليات الخاصة هي كمان وصلت سينا
كنباوي: دي حرب بقى
كنباوية: أمال انت فاكر أن الجيش حيسكت على كده الجيش بتاعنا مش شويه وله هيبة وعمره ما حيفرط في عساكره وجنوده
كنباوي: وإمتي ساعة الصفر؟
كنباوية: الله أعلم خاصة أن الحلول السلمية باءت بالفشل مع الخاطفين مشايخ القبائل في سينا ما عرفوش يتوصلوا لأي حل مع الخاطفين ومستنيين قرار من مرسي
كنباوي: الوقت اللي بيمر مش في صالح المخطوفين زمانهم هربوهم
كنباوية: ده أكيد يا كنباوي مش حطين العساكر مع بعض مفرقينهم عن بعض علشان لو حد فيهم اتمسك غيره ما يتمسكش
كنباوي: ولاد كلب واعيين وناصحين وواخدين احتياطاتهم كويس
كنباوية: طبعا يا كنباوي مش إرهابيين وفاهمين همه بيعملوا إيه كويس؟
كنباوي: ربنا يستر ويجيب العواقب سليمة
كنباوية: يا رب يا كنباوي يا رب يسمع منك ربنا
كنباوي: يلا نتغدى واللي فيه الصالح والخير يعمله ربنا قادر على كل شيء
كنباوية: يلا يا كنباوي وكل نار تصبح رماد لما تقيد