دورى تداول السلطة

هاتفنى صديقى المناضل حمدين صباحى وسألنى عن حل للخروج من نفق الإخوان المسلمين.. فتعجبت من هذا الوصف وقلت له: يعنى إيه نفق الإخوان المسلمين يا حمدى؟!.. قال: يعنى نفق الإخوان المسلمين يا سحلول!!.. قلت: شكلك متنرفز يا حمدى!!.. قال: أيوه أنا متنرفز وأنت بتستهبل من أولها ومش عايز تدينى حل!!.. قلت: حاضر ولاتزعل ياحمدى هقولك الحل!!.. قال: أنا اسمى حمدين مش حمدى ياسحلول!!.. قلت : شفت بقى أديك أنت اللى مش عايز تسمع ياعم حمدى!!.. قال هسمع بس انطق اسمى صح حمدين مش حمدى!!.. قلت: ياسيدى انت حمدين قدام الناس علشان تملأ عينيهم الطاق طاقين وينتخبوك لكن بالنسبة لى فأنا أحب أن أفصلك عن بعضك يعنى انت جواك حمدى لذيذ ورايق وحمدى تانى مناضل وثاير، ولأننا أصحاب أنا بحب أكلم نصك الأولانى فعلشان كده بقلك ياحمدى!!.. قال: خلصنى ياسحلول عندك حل للخروج من الأزمة ولا معندكش؟!.. قلت: عندى ياعم الحاج وهقولهولك حالا.. إحنا نعمل دورى ونسميه دورى تداول السلطة.. يعنى إيه رأيك إحنا نسيب الانتخابات البرلمانية هذه المرة للإخوان والسلفيين ينافس بعضهم البعض ويطحن بعضهم البعض وننفخ إحنا فى النار من بعيد فتشتعل بينهم ويخلصوا على بعض.. وبعد ذلك ننقض نحن على الفائز منهم ونهزمه شر هزيمة.. وبذلك يعود الإخوان إلى جحورهم ونزج بالسلفيين فى السجون والمعتقلات وبهذا نحصل على دورى مصر.. لكن يبقى سؤال: لمن سنهدى الدرع ياعم حمدين؟!