أحمد عبد الملك يكتب: الإدمان الجديد

زمان كان مفهومنا عن الإدمان
إنه حرام وإنه من فعل الشيطان
له كم صورة الكل عارفها
حقنة وبودرة أو دخان
=============
وإن المدمن شخص مريض
تافه فاشل.. واد فسدان
ملموم على شلة شريبة
كلها عيبة وخيبة وجنان
وبيفصل نفسه عن الواقع
ويعيش عقله ف توهان
=============
ولو ف بيوتنا واحد مدمن
كان يمشي بينا خجلان
ولا يمكن يتعاطى ف بيتنا
كان يتبهدل.. كان يتهان
=============
خلاصة الفكرة إنه بيعني
عادة حقيرة لشخص جبان
نسبة بسيطة ف بعض بلادنا
ومش موجودة في كل مكان
=============
وطول ما عنينا شايفة ولادنا
أكيد هيكونوا بخير وأمان
وطول مانا قافل بابي عليَّا
إيه يخوفني من الإدمان
لحد ماجانا الصنف العالي
صنف بيحرق في الأوطان
============
اللي اتسلل جوه عروقنا
واللي بسببه الود اتهان
اسمه (الفيس) لو تسمع عنه
دا اللي هيقضي ع الإنسان
============
اللي مقطع كل صلاتنا
واللي بننسى عشانه صلاتنا
واللي بيخطف منا حياتنا
واللي معيشنا ف أوهام
============
واللي مضيع كل أوقاتنا
واللي مشتت كل ولادنا
واللي مفرق كل عيلتنا
واللي قتل صلة الأرحام
============
واللي أفقدنا الإحساس
واللي بيفضح كل الناس
واللي بسببه صداع الراس
غيبة نميمة في أي كلام
============
واللي جرفنا مع التيار
واللي بيقلب ليلنا نهار
واللي مسح كل الأفكار
واللي عليه بنحب ننافق
============
اللي مغير في الشخصية
واللي عايش دور المثالية
حتى أسماءنا مش حقيقية
تسعين كذب وواحد صادق
============
واللي خلق فينا السلبية
واللي فصلنا عن الواقعية
ومفيش حاجة بقت طبيعية
حتى التعبير عن مشاعرنا
=============
بصورة بسيطة تبان فرحان
وصورة تبان إنك زعلان
وفيه مكسوف وفيه خجلان
بضغطة بسيطة نحكي حالتنا
=============
واللي متابع قال الموضة
واللي عازل نفسه في أوضة
يصرخ لو جت جنبه بعوضة
أصله مركز في التليفون
=============
يا خسارة كنا ما بنصدق
ييجي الوقت عشان نتجمع
أنا واخواتي وكل البيت
ومن قلبنا نضحك ونكركع
=============
وأمي بتسأل واحنا نجاوب
وأبويا ينادي كله يرد
كان في بينا تواصل أسري
كان فيه ألفة وحب وود
=============
الفيس أصبح كل حاجاتنا
مش ممكن.. شيء مش معقول
الفيس بيدمر ف حياتنا
وفين السائل.. مين مسئول؟!