المُزة ما تعملش كده (حلقة 16)

آعده ولا في بالي اي انواع النصايح لاي مزز وباقول لنفسي يا فريسكا مالك ومالهم سيبيهم في حالهم وصوت من بعيد نداني وفضل يزن علي وداني. قالي بالعكس ده انتي لازم تنزلي الشارع كمان وتشوفي المزز وتنصحيهم امال ربنا خلقك مزة ليه ؟!!
وأول ما نزلت الشارع لا بيا ولا عليا لقيت مُزه ما اعرفهاش ماشيه وبتقول يا حيط داريني ووراها واحد بعربية عمال يعاكسها ويقولها يا جميل يا عسل يا أبيض يا منور يا مدور انت.
رحت موقفة البنت وقلتلها انتي خايفة منه ليه. لقتها يا كبدي نفسها مش طالع وقالتلي ده بقاله ساعة ماشي ورايا وأنا مش لاقية ولا تاكسي ولا أي حاجة تاخدني من هنا.
قلت: وانتي إيه اللي مخليكي تسكتيله ما وقفتيش ليه هزأتيه وفرجتي عليه الناس.
قالت : ناس مين اللي هتتفرج عليه الناس هتتفرج عليا انا ويمكن يطلع قليل الأدب ولا حاجة أنا أعمل ايه ساعتها بقي ؟
قلت: وحتي لو كده تقومي تخافي وتترعبي وتمشي في الشارع وانتي زي الفار المبلول. لا المزة ما تعملش كدة.
المزة لما تلاقي واحد رزل زي ده .. تشده جمب اقرب قسم شرطة وتوافقي تتكلمي معاه خليه ينزل من العربية عشان يكلمك أول ما يوصل عندك إعملي ان كعب الجزمة اتكسر وقوليله ثانية واحدة امسك الشنطة.. ووطي وانتي قايمة بعد ما تشيلي جزمتك في ايدك - كأنك بتعدليها - وارقعي بأعلي صوت يالهوووووووووووووى حرامي وبيسرق شنطتي .. وبكعب الجزمة وفي نافوحه وعلي ما يجيلك حد من القسم هيكون فقد حوالي 3 لتر دم ومحتاج إعادة تأهيل .. ما هو اللي يعمل مع مزة كدة .. ما يستاهلش إلا كدة.